Andrupămintu economic tră Republica Moldova
Guvernul a Româniillei deadi undă veardi a agiutorlui financiar nirambursabil di 100 di milioane di euro tră Republica Moldova
Corina Cristea, 28.03.2022, 20:15
Cu andrupămintulu declarat tră Chișinău, Bucureștiul feaţi, săptămâna tricută, nica ună jgllioată tru demersul a llei ta s’agiută Republica Moldova tru imnaticlu a llei european – goala cale ta s’lli-asiguripseasca stabilitatea, prucukia, dizvoltarea economică şi socială. Guvernul a Româniillei aprobă, viniri, acordul mutrinda agiutorul financiar nirambursabil di 100 di miloane di euro akicăsitu cu executivul a Republicăllei Moldova tru ședința comună di meslu ţi tricu.
Premierul Nicolae Ciucă: “Aşe, aţel agiutoru financiar nirambursabil di 100 di milioane va s’poată s’hibă accesat di cătră Guvernul a Republicăllei Moldova, acord cari reprezintă protlu element di Andrupămintu a eforturilor Republicăllei Moldova di dizvoltare şi, dealihea, di realizare a reformelor şi Andrupămintuul pe cari noi ălu dăm tră imnaticlu european a Ripublicăllei Moldova.”
Păradzlli va s’hibă ufilisiţ tră construirea di reţele di apă şi canalizare şi tră reabilitarea instituţiilor di nviţământu şi di cultură, maxusu tru mediul rural. Proiectele cari va s’hibă finanţate cu aeşti păradz va s’ndreaga năi locuri di lucru și va s’poată s’da a oamenilor pistipsearea tru perspectiva ta ş-ndreagă un yinitor acasă, lugursescu autoritățli di la Chișinău. Aestu acord easti, practic, instrumentul pritu cari nă pripunem s’ndrupămu racordarea susta, vărtoasă a Ripublicăllei Moldova la spațiul european, pritu căllouri şi apunţă, pritu rețele di electricitate și gaz, pritu proiecte di dizvoltare rurală, cundille premierul român. Tru idyiulu kiro, nica spuni Nicolae Ciucă, acordurle cari mutrescu construirea a unăllei apunti pisti arâulu Prut, la Ungheni, cari va s’leagă cu autostrada Târgu Neamţ – Iaşi – Ungheni, respectiv anvărtişearea a apuntillei rutieră di sinuru anamisa di Galați și Giurgiulești au ună vărtoasă semnificație practică și simbolică mutrinda conectarea anamisa di România și Republica Moldova.
Andrupămintul a Bucureștiului tră Chișinău s’manifestă, dimi, pe ma multi planuri. Tru aestă categorie poate s’hibă spus, di exemplu, și memorandumul di akicăseari anamisa di guvernele a Româniillei și Ripublicăllei Moldova mutrinda cooperarea tru domeniul a securitatillei energhetiţi. Ama și acordul cari pruveadi scădearea a tarifelor di roaming şi tră convorbirile telefoniţi internaţionale anamisa di aţeali două văsilii. Ică apofasea-a Ministerului Educaţiei di București tra s-da a Ripublicăllei Moldova, anual, 2.550 di burse tră nviţământul preuniversitar şi universitar, până tru 2026. Datile ofiţiale spunu că România easti primlu partener comercial a Ripublicăllei Moldova şi unu ditu prinţipalii a llei investitori. Volumul a comerţului tră anul 2021 easti di 2,4 miliardi USD – un record tru relaţiile bilaterale, iara politica aţiloru două văsilii surori easti ta s’bagă tu practico acutotalui potențialul babageanu di coopearare existentu.
Autor: Corina Cristea
Armânipsearia: Taşcu Lala
