Andridzeri fiscali tru România
Tru România, proiectul di alăxeari a Codlui Fiscal fu publicat şi agiumsi tru debatu publicu.
Mihai Pelin, 06.07.2022, 17:27
Ministerlu a Finanţelor di București adusi tru dibatlu publicu proiectul di alăxeari a Codului Fiscal, cari lipsea s’hibă adoptat di Executiv stămâna yinitoare. Aestu pruveadi creaştirea a impozitelor tră amintatiţli ditu agiocuri cu tihea, criştearea a accizelor la ţigări şi biuturi alcoolice, ñicurarea plafonului până la cari s’facu licşurări fiscale tru construcţii, agricultură şi tru industria alimentară, trădzearea mănă di la impozitul specific tru domeniul HoReCa – hoteluri, restaurante, cafenele – şi turnarea la impozitarea pe ţifra di emburl4ki. Tuti aesti misuri va s’bagă tru practico di la 1 agustu.
Documentul ari şi unu şingiru di pruvidiri cari s’bagă tru lucru ditu ahuhrita a anlui ţi yini. Ntră aestea s’ar4dăpsescu creastirea a impozitului pe dividindi di la 5 la 8 procente şi alăxearea a criteriilor tră ncadrerea tru categoria microntreprindirilor, pritu ñîcurarea a praglui ti veniturli amintati tru anlu precedint di la un milion di euro la 500 di ñilli di euro, cum şi instituirea condiţiillei ca microntreprindirea s’aibă minimum un lucrătoru cu contractu activ.
Tutunăoară, ahuhrinda cu 1 di yinaru 2023, cota di TVA creaşti di la 5 la 9% emu tră livrarea di alimente, inclusiv biuturi, emu şi tră serviciile di restaurant şi di catering, ama şi tră activităţile di cazare hotelieră. Proiectul pripune şi alăxearea a impozitului pe clădiri.
Di altă parte, izvuri guvernamentale zburăscu şi ti posibilitatea că pot s’crească pensiili, tut di la ahuhrita a anlui viitor cu un procent aprukeatu di atelu ali inflaţie.
Proiectul di alăxeari a Codului Fiscal fu unu di subiectele abordate tru cadrul a unei conferinţei di presă ţănută di prezidintul Klaus Iohannis. El spusi că easti ananghi di ună modirnizare ti tut cadrul fiscal şi cundille că zbură cu premierul liberal Nicolae Ciucă şi cu miniştrii di resort ti aestu lucru. Şeful statului cundille că nu s’discută ti niţi unu impozit şi niti ună taxă tră oamiñilli di arada, că maş ti situaţii cari nu eara reglementate până tru aestu kiro.
Klaus Iohannis: “Eu ălli plăcărsiiu s’li mindueasscă multu ghini, s’nu aibă ună fortumă suplimentară tră oamenii di arada, s’nu aibă ună inhibiţie tră afaceri, că s’aibă ună corecţie cari faţi s’hibă cama transparenti lucărli, ma corecte şi cari, neise, duc la ună ma bună colectare a păradzloru tră bugetlu di stat, ună ma bună colectare nsimnănda că s’ñicureadză evaziunea fiscală.”
Tru aestu kiro, nu ari un plan tră intrarea ali Românie tru un procediu di sirţălle, nica spusi prezidintulu, cari exighisi că misurli di aestă turlie loati tru kirolu a crizăllei economiţi ditu 2009 nu avură un rezultat bun. Tutunăoară, el feaţi timbihi că Statul român nu poate s’ahărdzească dipu mulţă păradz ti compensari scunkirea a carburanţilor, tru ditrimentul a investiţiilor, cari suntu anănghisiti. Preidintul spusi ă easti haristusitu di lucărlu a Guvernului şi cundille că membrilli a Cabinetlui lucrară cu hăiri si ndreapisră multi probleme.
Autoru: Mihai Pelin
Armânipsearia: Taşcu Lala
