Andamasi B 9 la Varșovia
România ma largu va u ndrupască Ucraina, ahătu kiro cătu va shibă ananghi, spusi prezidentulu Iohannis, Varşovia, la summitul B9.
Corina Cristea, 23.02.2023, 17:02
“Val lu-apărămu cathi ţentimetru al NATO” – easti mesajul dimăndatu di prezidentulu american, Joe Biden, la andamusea di Varşovia a liderlor formatului Bucureşti 9, cari ncurpilleadză România, Polonia, Bulgaria, Cehia, văsiliili baltiţi, Slovacia şi Ungaria.
“Ca flancu estic al NATO, hiţ tru prima linie ali apărari colective aliate. Ştiţ ma ghini ca iţido insu cari easti miza a conflictului actual, nu maş Ucraina, că şi libirtatea a democraţiilor europene”, nica spusi Biden, andi adusi aminti Articolul 5, uidisitu cu cari iţi atacă contra a unui stat NATO easti ună atacă contra a tutăloru.
Şi secretarlu gheneral ali Alianță Nord-Atlantică, Jens Stoltenberg, cundille Varșovia că a Moscovăllei nu lipseaşti să’lli si da izini s’agudească securitatea europenă şi spusi vărtosu că easti ti unitatea aliaţilor tră ndruparea ali Ucraină cu tut ţi easti ananghi.
Jens Stoltenberg: “La un an di la lansarea ali invazie ruseşti, prezidentulu Putin nu s’ndreadzi ti irini. Nica ş-cama multu, el s’ndreadzi ti cama multu polimu. Neise lipseaşti s’ndrupămu şi s’criştemu agiutorlu ti Ucraina. Lipseaşti s’dămu ali Ucraina atea ţi ari ananghi tra s’azvingă. Nu ştim cându va s’bitisească polimlu, ama cându va s’bitisească s’nă asiguripsimu că istoria nu va s’facă diznău.”
La reuniune, România fu reprezentată de prezidentulu Klaus Iohannis, cari tăxi fermitate tru agiutorlu aliat ti Ucraina şi căftă ună strategie ti securitatea la Amarea Lae.
Klaus Iohannis: “Aestu polimu adusi maş trăñipseari şi uruteaţă, crime şi purtrea a miliuñîloru di oamiñi ucraineni, aspărdzeri ţi nu s’au faptă şi nisiguranţă. Noi, liderllii di pi flancul estic, avem borgea tra să spunemu apufuseari ti apărarea ali irini. Lipseaşti s’continuăm să spunemu fermitate ti băgarea tru scupo angajamentili di agiutoru ti Ucraina ahât cât va s’hibă ananghi tra s’amintă aestu polimu.”
Unitatea şi solidaritatea aliate tră Ucraina suntu orlea zorlea esenţiale şi reprezentară arma secretă a văsiliiloru NATO, cundille liderlu di București.
“Rusia năpoi lu-adusi polimlu tru Europa, iara statele NATO di pi Flancul estic, andămusiti tru aestu format di coordonare a poziţiilor a noastre la nivel aliat, pi cari lu nkisimu deadunu cu prezidentulu ali Polonie tru 2015, easti tru prima linie a efortului di contracarare a efectelor negative a aluştui polimu fuvirosu, ţi nu ari dotu thimelliu”, nica spusi Klaus Iohannis.
Mizili a efortului a nostru tră s’aducă diznău irinea tru Europa suntu fără preţedentu, adăvgă el, şi suntu pricunuscuti şi anvărtuşiti pritu angajamentul fără echivoc ali SUA andicra di securitatea pi Flancul estic al NATO, reconfirmat pritu prezenţa prezidentului Biden la Summitul B9 şi pritu vărtuşamea a implicarillei a lui tru regiune. Aestă implicari easti demonstrată di creastirea a prezenţăllei americană pi Flancul estic, inclusiv tru România, ca factor multu importantu şi cu tălleari curayilu alu Arusie.
Autoru: Corina Cristea
Armânipsearia: Taşcu Lala
