Al 4-lea summit a Consiliului ali Europă
România easti un stur ţi andrupaşti susto valorli a Consiliului ali Europă, spusi, la Reykjavik, prezidentulu Klaus Iohannis.
România Internațional, 18.05.2023, 15:20
“Adunaţ stogu anvărliga a valorilor noastre/ Adunaţ stogu tră Europaˮ easti motto-ul sum cari s-dizv4rti, marță și ñiercuri, Reykjavik, tu kirolu a mandatlui ţi lu-ari prezidenţilla ali Islandei, 4-lu summit a Consiliului ali Europă. Andamasea s’ţănu tu contextul geopolitic fitrusitu di itia a polimlui di fuvirseari ali Rusie contra ali Ucraină. S’aduţemu aminti că instituția responsabilă tră democrație, ndrepturile omului și statlu di dreptu fu una ditu protili organizații internaționale cari apăndăsi pritu ună acțiune concretă neise pritu excluderea ali Rusie ditu arada a statilor membre.
Tră România, loarea parti la aestă andmasi pi nivelu analt ari ună semnificație ahoryea di itia că, tru 2023, s’umplu 30 de ani di cându văsilia s-adăvgă ca stat membru cu tuti ndrepturli la instituția di Strasbourg. Apofasea mutrinda aderarea ali Românie fu loată tru 1993, la protlu summit a Consiliului. Bucureștiul easti un sturu ti andrupasti susto valorli a Consiliului Europei, maxus a aţiloru mutrinda statul di dreptu, valori cari suntu, câtivărăoară, băgati dinintea a niscăntoru provocări tru născănti stati membri declară, ñîercuri, la Reykjavik, prezidentulu României, Klaus Iohannis. El spusi că aeşţă lipseasti s’hibă tu ñiedzlu a mengăllei şi easti esenţial să s’cilăstăsească susta contra a extremismului, populismului, xenofobiei și intolearanţăllei. Şeful statului roman spusi că văsiliili democratice ndrupascu Ucraina şi pi cetăţenii a llei.
“Polimlu ali Rusiei easti ună atacă contra a valorilor şi principiilor a noastre comune. Ama aestă criză, nai ma seertă di la bitisita a Doilui Polimu Mondial, u ascumbusi unitatea noastră şi apofasea ta s’vigllemu turlia di bană democraticăˮ – spusi Klaus Iohannis. El cundille că, la summit, fu adoptată ună declaraţie di thimilliuseari a unlui Registru a Zñiiloru ţi s’feaţiră di itia a fuvirsearillei ali Rusie contra ali Ucraină.
“Aestu registru easti ună protă jgllioată tră thimilliusearea a unăllei structură cari s’compenseadză tuti zñiili fapti di itia a polimlui. Năpoi adutemu aminti, ase, angajamentul statelor participante andicra di simasia ti băgarea tru practico a obiectivlui ti aduţeari dinintea ali justiţie internaţională a persoanelor responsabile tră planificarea şi făţearea a crimăllei de agresiune contra ali Ucrainăˮ, cundille Klaus Iohannis.
Di altă parti, șeflu a statlui român dimăndă adoptarea a unui document politic, parti a Declaraţillei a summitlui, cari u spuni pricunuştearea, la nai ma analtu nivel politic, a ndreptului la un mediu kiskinu, la un mediu sănătos şi durabil ca hiinda un ndreptu a omului aflat tru streasă ligătură cu alte drepturi a omlui şi cu ndreptul international. Să spuni, tutunăoară ti darea silă a lucurlui tru Consiliulu ali Europă tru materie şi thimilliusearea, tu yinitu, a unui Comitet tră mediu şi ndrepturile omului.
Autoru: Leyla Cheamil
Armânipsearea: Taşcu Lala
