Agiutoru European tră Ucraina
Prezidentulu ucrainean, Volodimir Zelenski, lă căftă a liderloru europeani agiutoru suplimentar tră văsilia a lui, nica şi avioane di alumtă.
Tașcu Lala, 10.02.2023, 15:44
Tru şcurtu kiro va s’umplă un an di invazie arusească tru Ucraina, iar polimlu nu da seamne că va să scada tru intensitate. Ana ! Andămusiţ Bruxelles, tru Consiliu European extraordinar, șefañilli di stat și di guvern ditu Uniunea Europeană nkisiră neise, di la premisa că stămâñili yinitoari va s’hibă dicisive tră rezultatul a alumtiloru. Ti aţea, prezidentulu a Consiliului, Charles Michel, căndăsi ateali 27 di stati membri sa’păndăsească ti anănghiserli di armati a Kievlui – băruti, artilerie, rachete, vehiculi ică sisteme di apărare. Europenii sunt reticenți, ama, tru aestu kiro, tra s’txească avioani di alumtă, pi cari Ucraina li caftă niaumtinatu, cu asparizma a unăllei escaladari a conflictului cu Moscova.
Tră s’angreacă cama multu căftarea di agiutoru a văsiliillei a lui, la Consiliul di Bruxelles eara dus işiş prezidentulu ali Ucraina, Volodimir Zelenski: ʺTră Ucraina, Europa easti casa a llei. Escu aoa tra s’veglliu aestă cali cătă casă a popului a meu. Ucraineañilli, di tuti ilikiili, di tuti căndăserli politiţi, relighioase, di iţi statut suţialu, cu iţi istorie, tuţ nă hărsimu şi vremu aestă cali europeană comună, turlia di bană europeană şi turlia di bană ucraineană. Vărnu mindueaşti s’li curmă pritu un polimu. Căţe? Tră atea că după ţi va u aspargă Ucraina şi turlia a llei tra s’hibă, agresorllii va s’va s’aspargă şi turlia do bană ditu Uniunea Europeană, tuti aţeali 27 di concepţii di bană ditu Uniunea Europeană. Şi nu lipseaşti s’dămu izini ti aestu lucru. Aestu polimu total pi cari Rusia lu’nkisi contra a noastră nu easti maş un polimu tră teritoriu ditu partea a noastră di Europă. Nu! Zburămu aoa ti un dictator cu resurse babageani di armamentu sovietic şi cu armamentu pi cari lu-ancupără di la alti regimuri dictatoriali, maxus di la Iran. Şi, pi ună turlie cinică, Kremlinlu cinic şi deliberat, an di an mindui tra s’curmă şi s’aspargă valorli a noastri europeani.ʺ
Parti ditu ună parei di lideri europeañi, prezidintulu ali Românie, Klaus Iohannis, năpoi spusi la ună andamasi cu Volodimir Zelenski, simasia ti agiutorlu european tră Ucraina pi tuti comatlie şi ananghea ca ali Rusie să’lli si bagă ma largu presia, nica şi pritu adoptarea di sancţiuni suplimentare. Klaus Iohannis adusi aminti și ti acţiuñili solidare şi multidimensionale ali României, viţină cu Ucraina, emu trtu plan umanitar şi economic, emu şi di creaştiri a conectivitatillei, di licşurari a transportului di yimbruki ică di avansari a Kievlui pi calea europeană la cari ari nădie. Uidisitu cu un comunicat ali Administraţie Prezidinţială di București, prezidentulu Iohannis ălli pitricu, tutunăoară a, prezidentului Zelenski agiutorlu a Bucureștiului tră ʺformula di iriniʺ.
Autoru: Roxana Vasile
Armânipsearea: Taşcu Lala
