Agiutorlu a Româniillei tră Ucraina
Oficiallii româñi năpoi şi spunu andrupămintulu tră Ucraina viţină.
Bogdan Matei, 27.04.2022, 15:07
Idyealui cumu multi personaje di prim-plan a politicăllei europeani ică americane, trei ditu nai ma importanţă decidenţă politiţ ditu România eara duşi, marţă, Kiev, tra şi spună diznău andrupămintulu susta andicra di Ucraina aputrusită di askerili ruse. Premierul şi liderul PNL Nicolae Ciucă, prezidentulu a Camerăllei Deputaţlor şi a PSD, Marcel Ciolacu şi ministrul di Externe, diplomatul di carieră niafiliat politic Bogdan Aurescu, lă spusiră a responsabililor di Kiev că Bucureştiul easti deadunu cu elli şi cu populu ucrainean. Cama di 600 di kilomeatri di sinuru ampartu România di statlu viţinu.
La andamusea cu prezidentulu Volodimir Zelenski şi cu alanţă oficiali ucraineni, premierlu Ciucă prezentă misurle di agiutoru multidimensional tră Ucraina, nica şi pritu kivernisearea-a aţiloru cama di 820 di ñilli di persoane arifugati cari tricuă sinurlu cu România. Aesta nsimnă thimilliusearea tăburi tră arifugaţ, reglementarea accesului fără s’păltească păradz ti serviţii medicale, educaţionale şi di transport, cum şi la păzarea a lucurlui ditu România.
Aputrusită cu ună blocadă maritimă di cătră flota militară rusă, Ucraina ari dificultăţi ta ş’facă exporturile tradiţionale di yiptu şi produse di origine animală, iara şeflu a Executivului cundille, ca misură concretă di agiutoru, liberalizarea temporară di cătră România a transportului rutier di părmătie efectuat di operatorllii ucraineni, cum şi facilitarea accesului părmătiilor ditu Ucraina la porturli fluviale şi maritime româneşti.
România, spusiră oficialii viniţ di Bucureşti, easti disponibilă şi interesată s’llia parti substanţial la proceslu di reconstrucţie post-conflict a Ucrainăllei. Vizita a lor acăţă tu isapi şi localităţle Borodianka şi Irpin (nord), ţi suntu aproapea di capitala Kiev, însândzinate di trupele ruse, cari alăsară dupu eali groki comune şi cufumi pi geadei.
Premierul Nicolae Ciucă condamnă, diznou, fănicadzlli fapţă di trupele di aputruseari şi lu spusi agiutorlu a Româniillei tră dizvărtearea a unei investigaţii internaţională cari să-lli aducă dinintea a justiţillei pe aţelli stipsiţ di crime. “Vizita a dumnilliloru a voasti easti un semnu importantu şi limbidu di agiutoru tră Ucraina tru polimlu contra a Federaţiillei Ruse” – spusi prezidentulu Zelenski. El spuni că “ună componentă importantă a yinitorlui european comun va s’hibă protecţia şi dizvoltarea absolută a minorităţlor a noastre naţionale – comunitatea ucraineană ditu România şi comunitatea românească ditu Ucraina”.
Şi prezidentulu a Camerăllei a Deputaţlor di la Bucureşti, Marcel Ciolacu, cundille că solidaritatea a popului român cu viţinllii a llei ucraineni caftă anvărtuşeari şi la nivelu a minorităţlor. Comunitatea românească ditu statlu viţin adună cama di 400 di ñilli di oamiñi, majoritatea concentraț tru nordul a Bucovinăllei, nordul și sudul a Basarabiillei și Ținutul Herța, teritorii românești arăkiti di fosta Uniune Sovietică stalinistă tru 1940 și priloate, ca stat succesor, di Ucraina tru 1991, unăoară cu dezintegrarea URSS.
Autor: Bogdan Matei
Armânipsearia: Taşcu Lala
