Abuzurli ditu căminili tră auşeañilli
După căvgălu număsitu Azilili a lăhtarillei, tru România sfac controale la ţentrili iu suntu internaţi cilimeañi, auşi şi pirsoani cu dizabilităţ.
Bogdan Matei, 10.07.2023, 20:05
Băgatu pi ipotisi ti ma ptănu di un mesu, năulu premier român, liderlu social-dimocrat Marcel Ciolacu, ari ună ahurhită di mandat neise cama lişoru. Pi ningă problemele curenti, el lipseaşti s’kivernisească tora un babageanu căvgă judiciar, mediatic şi politic: abuzurli lăhtăroasi ditu căminili tră auşi di ningă Bucureşti. Premierlu u gri la lucru echipa executivă tru dzuua di dumănică, tră s’facă isapi catandisea ditu giudeţlu Ilfov, aclo iu procurorlli aflară parei infracţionale organizate, ţi exploata şi trăñipsea oamiñi făr di agiutoru. Şeflu a Guvernului căftă di la autorităţli cu atribuţii di control ună verificari tru tută văsilia a ţentriloru di stat şi particulari cari da asistenţă a cilimeañiloru, auşlloru şi aţiloru cu dizabilităţi. El spusi că nu faţi ca instituţiile di control să-şi arucă căbatea ună alantă.
“Ici nu am ñilă tră nafimaţlli cari adrară aesti azili a lăhtarillei, iara faptul că aşi ţiva fu di căbili nă spuni un singur lucru: avem dininti ună problemă di sistem. Sistemlu lipseaştis’hibă alăxitu” – spusi primlu ministru.
Declaraţiile a lui yinu după ţi procurorlli DIICOT (parchetul antimafia) nkisiră ună anchetă la trei ţentre di asistenţă ditu Voluntari şi Afumaţi (căsăbă şi, respectiv, comună satelit a Bucureştiului), tră tratamentele inumane la cari eara băgaţ beneficiarlli a alustoru. Ndauă pirsoane fură ţănuti tru dosarlu cu numa “Azilele a lăhtarillei”, inclusiv aţelu ţi ndreapsi emburlăkea – un ţi pănă tora eara nicănăscutu, neise Ştefan Godei. Uidisitu cu investigatorlli, aestu amintă di la stat pisti 3,7 milioane di lei (cama di giumitati di milion di euro) tru ma puţă di doi ani. Ună mari parti di păradz ălli hărgiuea pi droguri, putani şi căntători, tru kirolu anda auşlli eara mutriţ ca tru lagărele di concentrare: bătuţ, fuvirsiţ, foamitea pi elli, băgaţ s’lucredză cu zorea, nu avea condiţii minime di igienă. Aproapea ună sută di oameni fură priloaţi, tru dzălili ditu soni, ditu Afumaţi şi Voluntari di cătră pareili SMURD, tra s’hibă băgaţ tru spitali ică alti ţentri di tratament.
Tru aestu kiro, opoziţia di Bucureşti caftă demisia a ministrului Familiei, Gabriela Firea, colegă tru PSD cu Ciolacu, cătră cari presa spuni că duc tuti hirili alustui dosar. Di 23 di ani, primar a căsăbălui Voluntari easti nicukirlu ali Firea, Florentin Pandile. Ună soră a ministrului cumăndusi sistemul di asistenţă socială ditu Ilfov. Atelu număsitu di jurnalişti nafimatlu Godei ălli fu şofer politicieanăllei tu kirolu căndu aesta eara primar gheneral a Bucureştiului, anamisa di 2016 şi 2020. Vărnu nu invocă responsabilităţ penale tră Firea tru dosarul “Azilele lăhtarillei”, ama multă lume easti simfună că imaginea a llei easti greu zñiipsită şi faţi slăbinţă emu a Guvernului emu a partidului. Şi tut ma pţăni minduescu că Firea va s’aibă nădii s’agiungă diznă edil ali Capitală, aşi cum avea dimăndată că ari vrearea, tru perspectiva alidzerloru locale ditu anlu yinitoru.
Autoru: Bogdan Matei
Armânipsearia: Taşcu Lala
