Absorbție-recordu di fonduri europeane

Fondurile europeani trapti anlu tricut di România agiumsiră pi un livelu recordu, spuni premierlu Nicolae Ciucă. El ari ună estimari pozitivă tru ţi mutreaşti creastirea economică.

Mihai Pelin, 05.01.2023, 13:30

România aprăftăsi, anlu ţi tricu, ună absorbţie di fonduri europeani di pisti 11 miliardi di euro, dimăndă premierlu Nicolae Ciucă. Șeflu a Executivului spusi că easti nai ma analtu livel agiumtu di cându ari acces la aesti finanţări europeani, iara tră 2023 ari naeti ţănearea ică năstritearea a lui. Tru dişcllidearea a protăllei andamasi di guvern ditu aestu an, el nica spusi că România avu ună execuţie bugetară bună şi că s-ncadră tru deficitu. Tru minduita a lui, Guvernul aprăftăsi realizarea a unei creaştiri economică pi cari nu u avea pruvidzută tu ahurhita a anlui tricutu, maxus după declanşarea a polimlui tru Ucraina şi după efectele pi cari li adusiră creastirea a păhadzloru la energie şi la gaze. Păradzlli europeañi cari intră tru România lipseaşti s’ndrupască, prota ş-prota, investiţiile, spuni premierul Nicolae Ciucă, aţea turlie că economia naţională s’poată s’ţănă keptu la provocărli ică efectili cari s’dukescu ică va s’dukească la nivelu a economiillei europeani ică mondiale.

Nicolae Ciucă “Tră văsilia a noastră predicţia easti una pozitivă şi România acă numata va s-aibă idyiulu nivel di creaştere, va s’aibă ună creastire economică şi ea lipseaşti s’hibă ndrupătă pritu misuri la nivelu a Guvernului şi pritu misuri di agiutari a mediului di afaceri, a mediului antreprenorialu aşi cum u feaţimu şi anlu aestu, vahi ma multu di ahăntu, tră atea că avem ma largu la dispoziţie fonduri di garantari, garanţii di stat. Păradzlli pi cari lli-avemu la dispoziţie anlu aestu sunt 112 miliardi di lei ( cca. 22,7 miliardi euro) pruvidzuţ tră investiţii, cari să s’ducă concret tru investiţii.”

Premierlu adusi aminti că nai ma mulţă păradz eara ahărdziţ şi anlu aestu ti investiţii, ama tră realizarea a ţintilor pripuse easti ananghi di solidaritate, empatie la nivel naţional, dialog cu partenerllii sociali, coordonari anamisa di ministere şi, nu dipu tru soni, di stabilitate politică. El nica spusi că şi tru aestu an va s’hibă promovate proiectele ţi eara tru akicăseari cu partenerii di coaliţie, s’hibă că aestea mutrescu educaţia, sănătatea, ică ti sturlli şi ţintele ditu Planul Naţional di Redresari şi Rezilienţă.

Nicolae Ciucă “Avemu faptă muabeti tra s’bitisimu şi s’agreăm ma largu paketa di nomuri ali educaţie, s’deapoa unăoară ţi va s’ahurhească naua sesiune parlamentară s’avem asigurată pacheta di nomuri cari va s’intra tru debatu tru Parlament. Pi domeniul a sănătatillei avem tutunăoară apufusiti proiectele şi misurli cari mutrescu fătearea ma cu hăiri sistemlu medical ditu văsilia a noastră, suntu proiectili di modernizari a spitalelor pritu PNRR şi ateali pritu proiectili europeani.” Di altă altă parte, premierlu cundille că ari duri fonduri și tra s’ăltească di cu kiro ndrepturli ţi lă si cadu a pensionarilor ică ti alti categorii di cetăţeañi.

Autoru: Mihai Pelin

Armânipsearea: Taşcu Lala