20 di añi di la thimilliusearea a Forților tră Operațiuni Speţiale
Cu arastea că s-umplură 20 ani di existență a Forţioru tră Operaţii Speţiale fu nsimnată pritu ună ţeremonie impresionantă, la cari eara vinitu premierlu și alti ufiţialităţ.
Tașcu Lala, 03.03.2023, 17:56
Dzuua di 1 di marţu 2003 easti un momentu di referinţă tru istoria Armatei României, marcândalui thimilliusearea, la Târgu Mureş, a Batalionului 1 Forţe Speciale, prima structură di operaţii speciale ditu văsilie. Anlu aestu, cu arastea că s-umplură 20 ani di existență a Forţele tră Operaţii Speciale fu nsimnată pritu ună ţeremonie impresionantă, la cari eara viniţ pisti 400 di militari şi pisti 30 di hălăţ tehniţi, inclusiv avioane şi elicoptere militare.
Tru cadrul a ţeremoniillei, la cari loară parti premierul, prezidentulu Camerei Deputaţlor şi miniştrii di Interne şi ali Apărari Naţională, un moment special fu paraşutarea a hlamburiloru ali Românie, NATO şi a Forţilor tră Operaţii Speciale. Prim-ministrul Nicolae Ciucă cundille rolu pi cari lu-au Forţile Speţiale tru garantarea securitatillei naţionale, sumliniinda că România aprăftăsi tra ş-construiască structuri speţiale la nivelu a tutulor categoriilor di forţe, aeastea hiinda ncadrate cu militari di elită profesionişti, cu aptituditui dizvultate di alumtători axiziţ ta s’ţănă keptu la iţi catastisi speţială, di itia că ş-ntimilleadză furteaţa di intervenţie tru teatru pi surpriză, viteză di acţiune, ingeniozitate, mobilitate, flexibilitate, akicăsearea a mediului di acţiune ditu videala cultural, lingvistic.
Prezidentulu a Camerăllei a Deputaţlor, Marcel Ciolacu, scoasi tu videală simasia a luştoru unităţ di elită, maxus tru contextul polimlui ditu Ucraina.Ştiu că tru forţele a noastre di Operaţii Speciale sunt militari di elită, profesionişti cu axii dizvoltate di alumtători şi di lideri, majoritatea hiinda simultan paraşutişti, scafandri şi alpinişti, axi tra s’ţănă keptu ti iţi catandisi speţială spusi Marcel Ciolacu. Escu pirifanu că România ari adză unităţ moderne, etimi s’apăndăsească ntrăoară şi apufusitoru ti catandisi di criză şi s’asiguripsească protecţia a cetăţeañilor şi a sinferurloru naţionale. Spun aesta maxus ma s-acăţămu tu isapi atea ţi s’faţi tamam la sinurli a noastre.
Aestă structură a Armatăllei Române spuni puteare, determinare şi misiuni complexe, lugursi și ministrul Apărarillei Naţionale, Angel Tîlvăr, anda adusi aminti că tru aţelli 20 añi di existenţă, Forţele tră Operaţii Speciale păltiră şi un duriros tribut di sândzu – șasi militari di elită s’feaţiră curbani tru misiunile ditu Afganistan, iara alţălli cădzură tru văsilie tru kirolu a niscăntoru activităţi di instruire. Tutunăoară,19 militari ali aiştei structură fură pliguiţ tru teatrili di operaţii.
“Hiţ ună componentă matură a Armatăllei ali Românie, hăirlătică, cu axizearii mari di reacţie la nivel strateghic, interoperabilă şi cu vărtoasi ligături cu structuri similare aliate şi partenere”, sumlinie tru mesajli dimăndatu a militarlor Forţilor româneşti tră Operaţii Speţiale și şeflu ali Apărari, ghenearalu Daniel Petrescu. Discreţ, modeşti şi multu hăirlătiţ, militarlli ditu Forţele tră Opearaţii Speciale agiuytă cu pirifañi şi profesionalismu văsilia, aclo şi atumţea cându aeasta lă u caftă, cundilleadză un comunicat a Ministerlui ali Apărari.
Autoru: Corina Cristea
Armânipsearea: Taşcu Lala
