10 mai tru istoria Româniillei
10 Mai, ună dzuuă importantă tru istoria a românilor
Leyla Cheamil, 11.05.2022, 14:30
Dzua di 10 Mai ari ună triplo semnificație tru istoria românilor, ansimnănda trei momente importante: amintarea a independențălei andicra di Imperiul Otoman, vinita al Carol di Hohenzollern Sigmaringen la București și ncurunarea aluştui. Pi 10 Mai, România sărbăturiseasti Dzua Independențăllei Naționale. Polimlu ruso-turc nkisitu tru apriliu 1877 fu ucazea ideală ca văsilia s’iasă di sumu vasalitatea formală a Imperiului Otoman. Acă indipendința fu proclamată tru Parlament, eara ananghi că ea s’hibă amintată și pi câmpul di alumtă. Trupele române comandate di văsillelu Carol I avură contribut dicisiv la polimlu ruso-turc, iara amintarea a indipendințăllei fu unu di momentele nai ma importante a dumniillei văsillelui. Congresul di la Berlin ditu 1878 apufusi independența absolută andicra di Imperiul Otoman.
Tru un mesaj pitricutu cu furñia aliştei dzua șeful a statlui român, Klaus Iohannis, spusi că curbăñili a niintaşilor nsimnară thimellilu a dizvoltarillei Româniillei europene. “Easti, tora, borgea a noastră s’ndrupămu şi s’apărăm valorile şi prinţipiile pi cari li mbărţitămu cu partenerllii a noştri euro-atlantiţˮ, spusi Klaus Iohannis. Aestu adusi aminti că bubukisirea a culturăllei, dizvoltarea industriei, transporturilor şi infrastructurii, ama şi a relaţiilor internaţionale ale Românie fură arodul ună ş-ună şi direct ti amintarea a indipendinţăllei di stat. El scoasi tu vidiala că semnificaţia aluştui eveniment easti, adză cu ahătu ma yilipsitoari cu cât himu martorllii a resuscitarillei a unei mentalităţ imperialiste tru numa c curi un stat indipendint easti sthinatu cu fuvirsearea barbară. Prezidintulu Iohannis cundille că libertatea, ndreptul a naţiunilor ta ş-aleagă şi construiască mira a lui işiş, vigllearea a banăllei şi nămuzillei suntu repere di thimelliu a comunitatillei dimocratiţi di cari ţănemu.
Tu arada a lui, premierul Nicolae Ciucă spuni, tru mesajul pitricutu cu furñia a dzuuăllei di 10 Mai, că, tru aestă perioadă ndilicată, prezenţa tru NATO şi tru Uniunea Europeană plăseadză România sum protecţia mplină a opţiunillei a llei pro-europene fără di turnari, anvărtuşită şi pritu parteneriatul transatlantic. Tut pi 10 Mai, easti sărbăturisită şi Dzua Regalitatillei, cari fu Dzua Națională a Româniillei ditu 1866 până tru 1947, până la yinearea a comuniștilor la puteari. 10 Mai marcheadză nkisita a domniillei di 48 di ani al Carol I di Hohenzollern Sigmaringen, protlu văsille ditu ună dinastie di patru. Cu aprukearea a amirălui francez Napoleon al III – lea și aţelu a văsillelui ali Prusie, Wilhelm I, prinţipele Carol nkiseaşti ti România și agiundzi, pi 10 mai 1866, la București, ahurhindalui ună lungă domnille. Tut pi 10 mai, ama tru 1881, Parlamentul votă alăxearea a văsiliillei ditu prinţipat tru regat, iara Carol I agiundzea protlu văsille ali Românie. Sărbăturisirea a dzuuăllei di 10 Mai fu curmată, prota tru 1917, di ocupația germană, a diapoa, di regimul comunist, după abdicarea cu zorea a văsillelui Mihai tru 1947.
Autor: Leyla Cheamil
Armânipsearia: Taşcu Lala
