Vacţinarea, anamisa di pistipseari şi nipistipseari
Majoritatea-a româňilor suntu dukimăsiţ di piriclliulu ţi lu spuni coronaviruslu, a deapoa aproapea giumitati ditu populaţie lugurseaşti că pandemia va s’ţănă nai cama pţănu doi – trei aňi, spuni un studiu adratu di Institutul di Cercetari tră Calitatea a Banăllei di la Academia Română. Sociologlu Iulian Stănescu, cercetătoru ştiinţificu tru arada-a Institutlui, ţănu unu zboru ti Radio România, tu ligătură cu scădearea-a solidaritatillei şi a pistipsearillei anamisa di români tru kirolu a pandemiillei.
Daniela Budu, 18.06.2021, 13:36
Iulian Stănescu: “Tru catandisi di criză suţială, cum fu aestă epidemie, ama dealihea potu s’hibă catandisi di polimu i atacuri teroristi i crizi di altă turlie, născănti societăţ cunoscu ună creaştiri a nivelui di coeziuni, alti cunoscu, ti amărtie, ună scădeari. Societatea românească faţi parte ditu a daua categorie şi putem să spunemu că dupu unu anu ş’trei meşi di anda ahurhi pandemia, ţesutlu social s’dukeaşti, organismul social ali Românie easti pidipsitu. Cu alti zboară, putem să spunemu că himu ună societati ma puţănu rezilientă. Rezilienţă nsimneadză axia a unăllei colectivitati, nica şi a unei societati tra s’ţănă keptu, ta s’li străxească ma lişoru şocurli, crizili suţiali”.
Ma multu di giumitati ditu români (56%) facu urminie a unlui insu cunuscut s’facă vacţinlu contra a năului coronavirus, iara atelli ţi suntu cama simfuňi tră vacţinari suntu oamiňilli tu ilikie şi persoanili cu studii superioari. Ari ama și cama di 2 miliuňi di oamiňi ditu tuti diplili suţiali cari suntu contra ti imunizari şi lă facu urminie a aţiloru di ningă elli s’nu s’vaccineadză. Trădzearea mănă ică ncuntrarea tră vacţinari easti băgată di aţelli ţi deadiră apandisi prota ş’prota pi zverca a ixikillei di informari, a manipularillei ică a dezinformarillei, ama şi cu asparizma ti reacţii adversi, nica ş-di moarti, pi nipistipsearea tu ţi mutreaşti hăirlătica-a vacţinurlor şi pi căndăsearea că năulu coronavirus nu există. Proţentul a aţiloru cari nu aproaki existenţa a viruslui agiumsi la 6, dimi cama di 800.000 di oamiňi, ună parei di oamiňi ňicurată ca proporţie, ama ţi easti duri tru numiru şi di cilăstisitoari tra s’hibă dukită cu prezenţa – cundilleadză realizatorlli a studiului.
Tru un kiro tru cari imunizarea easti la coti minimi, autoritățli cundilleadză simasia a vacţinarillei completă ti prevenirea infecţiillei cu viruslu SARS-CoV-2 și ndreadzi campanii di imunizari cama lărgurii pritu hori, iu naetea di vacţinari easti ma scădzută. Uidisitu cu spusa-a coordonatorlui a campaniillei di vacţinari, Valeriu Gheorghiţă, aproapea 50% ditu ţentrili di vacţinari ditu văsile suntu ufilisiti tu aestu kiro la ma puţănu di giumitati ditu capaţitati. Ti atea, lucărlu tru născănti ţentri va s’hibă ncllisu ti şcurtu kiro, a deapoa tru alti va s’hibă ňicşuratu programlu. Tutunăoară, tru contextul tru cari s-nreghistră ună ňicşurari “progresivă” a numirlui di oamiňi vacţinaţ anti-COVID, va s’hibă ňicşurată şi cantitatea di dozi livrati cătră București. Până tora fură ufilisiti aproapea 60% ditu aţeali aproapea 15 di miliuňi di dozi recepţionati di România.
Autoru: Daniela Budu
Armãnipsearea: Taşcu Lala
