Una naua sesiuni parlamentară
Tru brumar, clasa politică şi opinia publică fură acăţati cu lucurlu tră alidzerli prezidenţiali, amintati, niaştiptat, di fostul lider liberal Klaus Iohannis. Tru andreu, caplu social-democrat Victor Ponta amintă prit, un scor confortabil, un nău vot di nvestitură la căpia a Guvernului, la cari, pi ningă PSD, suntu asociati UNPR, PC şi dezidenţa liberală PLR, cooptat tru loclu a UDMR. Di ază, unăoară discl’isă naua sesiuni parlamentară, senatorl’ii şi deputaţl’ii pril’ia prim-planlu a scenăl’ei.
Bogdan Matei, 02.02.2015, 12:15
Tru brumar, clasa politică şi opinia publică fură acăţati cu lucurlu tră alidzerli prezidenţiali, amintati, niaştiptat, di fostul lider liberal Klaus Iohannis. Tru andreu, caplu social-democrat Victor Ponta amintă prit, un scor confortabil, un nău vot di nvestitură la căpia a Guvernului, la cari, pi ningă PSD, suntu asociati UNPR, PC şi dezidenţa liberală PLR, cooptat tru loclu a UDMR. Di ază, unăoară discl’isă naua sesiuni parlamentară, senatorl’ii şi deputaţl’ii pril’ia prim-planlu a scenăl’ei.
Tră majoritatea, cu numir cama mari, dimec social-democraţl’i, di prota thesi easti naua agendă di lucru a Legislativlui şi un dialog cama vărtos cu putearea executivă. Părăstisearea, tru ahurhita a cathi unăl’ei stămână, tru plen, a scupadzlor ţi l’iari guvernulu easti tăxearea ţi u l’ea ca borgi premierlu. Tru idyiul chiro putearea di stânga şi opoziţia – generic, număsită, liberală, unăoară cu darea sila a proţedurlor di făţeari ună, tru un nău PNL, a naţional-liberalilor cu democrat-libearal’ii — tăxescu că va să scoată di pi lucru scutlu a imunitatil’ei parlamentară tră alepţăl’i mintiţ tru dosari di corupţie.
Deputatlu Tinel Gheorghe cundil’eadză că libearalii va s-bagă zori tra s-armănă fără mandat alepţăl’i locali cari, astă toamnă, ş-alăxiră partidili ma s-ufilisiră di ună ordonanţă di Guvernu invalidată deapoa di Curtea Constituţională. Alăxearea ali legislaţie electorală, eventual prit turnarea, tră Parlamentu, la votlu pi listă tru loclu a aşi-spuslui uninominal, cari agiumsi s-hibă un eşec cu vazi, easti un altu scupo comun a PSD şi PNL. Niachicăserli ies tru videala cându să zburasti ti alidzearea a primarlor, pi cari social-democraţl’ii u caftă tra s-hibă apufusită tru un singur tur di scrutin, a deapoa libearalii tru dauă tururi.
Scupo lugursit multu ambiţios di aproapea tuţ comentatorl’ii politiţ, libearalii nica ş-pripun ca tru aestă sesiuni parlamentară să s-alăxeasca majoritatea dit Senat şi Camera a Deputaţlor, aţea turlie tra s-amintă arăsturnarea a Cabinetlui Ponta prit moţiune di cenzură. Pi agenda a Legislativlui nica va s-hibă acăţati tru isapi tră lucru amendamenti constituţionale, un nău cod fiscal, cata cum şi nomlu a insolvenţăl’ei tră persoanili fizice.
Ună pisti alantă, va s-hibă ună sesiuni laborioasă şi dramatic agudită di impopularitatea a Parlamentului di Bucureşti, a curi rată di pistipseari s-anvărteasti, di mulţă ani, anvărliga di masi dzaţi proţenti. Şi pi cari cetăţean’il’i ălu lugursescu nihăirlaticu şi bugetofag, maxus că, după alidzerli legislativi dit 2012, fu gonflat la nu ma puţăn di 588 di aleptă, cu chirolu agiumtă ma pţan’i tru numir di furn’ia a anchetilor anticorupţie di s-agiumsi la arestări şi condamnări.
U pricunoaşti isişi prezidentul di la Camera a Deputaţlor, social-democratlu Valeriu Zgonea, cari lă feaţi timbihi a soţlor că tută instituţia ari zn’ie, ună ixichi di imagine, a deapoa membril’i a lui suntu duchimăsit di public că suntu “furi”, “corupţă” şi “nilucrători”. El nica spuni că aesti dămţă nu suntu cu ndriptati şi tal’e curayilu tră mulţă ditru parlamentarl’ii cari lucreadză tin’isitu şi achicăsescu rolu ţi lu-au tru Legislativ.
(armanipsearea Tascu Lala)
