Un român tru cumăndusearea NATO
Secretarlu general al NATO, Jens Stoltenberg, apufusi să-lu număsească românlu Mircea Geoană tru ipotisea di adjunctu a secretarlui general, dimăndă, n’ercuri, un comunicat băgatu pe site-ul ali Alianţă. Escu hăriosu s-hăbărisescu alidzearea al Mircea Geoană tru ipotisea di adjunctu a secretarlui general. El easti un avocat ţi cilăstăseasti ti ligătura transatlantică şi va u aducă experienţa a lui di multu chiro ca om di stat şi diplomat a aistei ipotisi. El va s-hibă primul român cari va u aibă aestăipotisi di prota thesi, declară Stoltenberg. Site-ul NATO năpoi aduţi aminti că Mircea Geoană fu prezidentul a Senatului ali României şi avu nica si ipotisili di ministru ti externe şi ambasador ali României tru Statele Unite. Tutunăoară, Geoană easti thimil’iusitorlu şi prezidentul a Institutului Aspen dit România. Până tru aestu chiro, nai cama analtă funcţie a unui român tru arada NATO fu atea di asistentu a secretarului general al NATO, ţi u avu tru chirolu 2013-2017 Sorin Ducaru, cari lu avu şi rolu di şef ali Divizie tră Riscuri di Securitate Emergente.
Ştefan Stoica, 18.07.2019, 12:50
După hăbarea ufiţială, Mircea Geoană ngrăpsi, pi singirili di socializare, că alidzearea al năsu tru aestă funcţie easti ună provocari, ama şi ună oportunitate tra s-li reprezintă interesele a Alianţăl’ei, cari asiguripseaşti securitatea ti cama di un miliardu di cetăţeni. El să spusi multu tin’isitu tra s-hibă aleptu tră aestă ipotisi-cl’eaie, ţi reprezintă, tru opinia al năsu, ună pricunuşteare a importantăl’ei contribuţii ali României tru cadrul NATO. Mircea Geoană nica spune că, tru cariera a lui diplomatică şi politică, promovă ligătura transatlantică şi integrarea euroatlantică ali României. Ma multu, el alavdă andruparea politică şi instituţională transpartinică di cari s-hărsi candidatura a lui. Ministerul Afacerilor Externe salută alidzearea al Mircea Geoană ca Secretar General adjunct al NATO, ţi ulugurseaşti un moment ahoryea ti apartenenţa ali României la Alianţa Nord-Atlantică. Priloarea a aiştei funcţii di analtă responsabilitate la nivel aliat, nai cama analtă poziţie ţi u avu România tru ierarhia NATO, aproachi experienţa şi ărli profesionale a candidatului român şi reprezintă, tutunăoară, ună pricunuşteare ahoyea ti rolulşi contribuţia semnificativă ale României tru cadrul NATO, la 15 ani di la aderarea la Alianţa Nord-Atlantică, spuni MAE di Bucureşti.
Ministerul di Externe şi spuni căndăsearea că alidzearea al Geoană tru această importantă funcţie va s-agiută tră anvărtusearea ma largu rolului şi misiunil’ei NATO di securitate şi apărare colectivă a spaţiului euro-atlantic, trâ hăirlătica ali României, a tutulor statelor aliate şi a cetăţenilor a lor. Analţă oficiali di Bucureşti salutară, tru arada a lor, aestă alidzeari. Cariera diplomatică di succes – una tru contrast cu atea politică, tru cari eşuă – cum şi devotamentul constantu andicra di ligătura transatlantică ălu recomandară Mircea Geoană tră aestă analtă ipotisi tru Alianţă.
Autor: Ştefan Stoica
Armânipsearea: Taşcu Lala
