Un nau şef la SIE
Mihai Răzvan Ungureanu easti, diznau, directorlu a spion’ilor români, cari eara cumandusit interimar nică dit iarnă, cându fostul şef a Serviciului di Informaţii Externe, Teodor Meleşcanu, ş-avea data dimisia tra s-nchiseasca tru antritearea tra prezidentil’ea a vasiiil’ei. Istoric şi diplomat, MRU — cum nica al’i si spuni — li avu ipotisili di ministru di externe ali Românie anamisa di an’il’i 2004 şi 2007, deapoa di director a SIE anamisa di 2007 şi 2012, ama şi di prim-ministru, tra masi aproapea trei mesi, tru scurtu-mai 2012. Andreapsi recordul tra s-aiba nai ma scurtu mandat di premier dit istoria di pisti un cirec di secol ali Românie post-comunista.
Roxana Vasile, 01.07.2015, 13:24
Tute demnităţle, exercitate tru chirolu anda şef a statlui eara Traian Băsescu, l’i-adusira al Mihai Răzvan Ungureanu antipatia a social-democraţlor, cari vizură tru liberalu di 47 di ani un aprucheat a adversarlui a lor politic numirlu 1. Easti furn’ia tra cari nominalizarea a lui, diznau, di cătra actualu prezidentu Klaus Iohannis, a curi îl’i eara consilier, tru caplu a Serviciului di Informaţii Externe avu tru PSD efectu di bumearangu. Formaţiunea, cari lugurseasti ca s-mindueasti turnarea diznau a oamin’ilor al Traian Băsescu tru ipotisi cl’eaie, apufusi s-ambudyiuseasca votlu di nvestitură dit Parlament. Liderul a deputaţlor social-dimocraţ, Marian Neacşu, argumenta:
Ma nu ari un aviz ali Comisiei di specialitate, noi nu putem s-na exprimăm desi, tru aesta oara, domnul Mihai Răzvan Ungureanu tin’iseasti condiţiile tra s-hiba aleptu directorlu a Serviciului Român di Informaţii Externe.”
Aca nu loara parti la vot social-democraţl’i, secondaţ di reprezentanţal’ii a Alianţal’ei Libearalilor şi Democraţilor (ALDI), MRU fu, ama validat tru funcţia di director a SIE cu 278 di voturi tra şi 6 contra. Trapsi mana di la mandatul di senator PNL şi deadi giuratlu diclarândalui:
Easti annanghi di un nau cadru legislativ, di una nauă cultură a problematicii di securitate, di aanvaleari a diferenţelor di cunuaşteare ditru comunitatea di profesionişti şi societatea românească tru ansamblul a l’ei. Va s-yin cătra dumnil’eavoastra cu placarsearea tra s-agiutam tra reconstituirea pe bază di modernitate a legilor cari ţan di pacheta ali siguranţa naţionala.”
Românii aşteaptă ca instituţiile dit zona di siguranţă s-colaboreadza tra curmarea ali corupţie, anvartusearea a statlui di dreptu şi ali democraţie — nica spusi, tru plenlu andamusit a Parlamentului, Mihai Răzvan Ungureanu, tru favoarea a curi s-exprimara senatorl’ii şi diputaţl’ii dit PNL, UDMR, a minorităţlor naţionale, ama şi — tra ciudia a PSD-ului — parlamentarl’ii UNPR, una n’ică fomaţiune aflată la guvernari, deadun cu social-democraţl’i.
Angrapsearea: Roxana Vasile
Armanipsearea: Tascu Lala
