Tră reformă, ti dzuua ali Justiție
Avânda scupolu ta s’nsimneadză rolu şi simasia a putearillei giudicătoreşti, a partenerloru ali justiţie, a tutuloru oamiñiloru a nomlui cu scupolu ti anvărtuşearea-a statlui di dreptu, Dzuua ali Justiție fu apufusită tru România tru 1994 și easti sărbăturisită tru prota dumănică a meslui alunaru. “Himu tora un statu membru UE şi NATO, himu ligaţ di valorli a democraţiiloru anvărtuşiti europene şi himu tru praglu a unui proţes cabaia mari di alăxeri economiţi, suţiali şi politiţi”, să spuni tru un mesaju pitricutu, cu aestă furñie, di premierlu Florin Cîțu.
Corina Cristea, 05.07.2021, 16:28
“Tru aestu contextu, adăvgă el, reforma tru dumenea ali justiţie easti un proţes ţi lu ankisi di ma multu kiro coaliţia-a forţiloru proeuropene, cari cumăndusescu tora România. Nu va s’hibă lişoru. Ari nica mulţă cari voru ca justiţia s’armână nihăirlătică şi controlabilă. Ama, deadunu cu partenerlli a noştri instituţionali la nivelu european, himu acăţaţ tru un proţesu di vindicari ali justiţie di arăulu ţi ălli si adusi tru añilli di ma ninti”, cundilleadză premierlu.
“Reforma-a sistemlui judiciar numata poati s’aşteaptă”, spuni și ministurlu di resortu, Stelian Ion, cari cundilleadză că, la Ministerlu ali Justiţie, cilăstăserli s’facu ti crişteari ritmolu a digitalizarillei tu instanţi, interconectarea-a instituţiilor cari au dumenii di lucru cari s’ndzimineadză, asiguripsearea-a hălăţlorur materiali şi loghistiţi ti buna disvărteari a lucurlui judiciaru, cum şi a coerenţăllei legislaţiillei tru domeniul ali justiţiei. Ministurlu zbură și ti obiectivili ali Românie la nivelul UE, dimi “degrevarea a instanţelor di giudicată, scutearea a MCV şi duţearea ma largu a lucărlui cu monitorizarea-a statlui di dreptu pritu mecanismul Rule of Law, modernizarea şi hăirlătica tu justiţia ditu România”.
Tru mesajlu a lui, cumăndusearea a DNA spuni că tru multi locări ali societati aruşfetea ma largu easti prezentă, ti atea, curmarea a aliştei lăngoari lipseaşti s’armână un scupo cari s’nclleagă energhii, voli politică, resursi umani şi loghistică. A deapoa ca procurorii anticorupţie s-aibă hăirlătică tru lucurlu a loru, garanţiili di independenţă lipseaşti s’hibă tiñisiti şi năpoi anvărtuşiti.
Prezidentulu a Consiliului Superior ali Magistratură (CSM), Mihai-Bogdan Mateescu, spuni, tru mesajlu pitricutu ti Dzuua ali Justiţiei, că easti ananghi di unitati tru cadurlu a sistemlui judiciaru. El luyurseaşti că justiţia ma largu va s’neagă tru lucru cu giudicători integri, echilibraţ, buni profesionişti, cu tiñie ti societate şi cu aprukearea cu nămuzi a tuturor vulnearabilităţloru interni, am ava s-aib4 hăirlăticu ti dealihea tru ună societate cari să-lli akicăsească loclu, rolu, importanţa reală, anaparti di sloganuri şi fără subiectivismu.
Procurorul gheneralu a Parchetului di pi ningă Analta Curti di Casaţie şi Justiţie, Gabriela Scutea, pitricu, tu arada a llei, un mesaju tru cari spuni că ari argumenti vărtoasi, tru ligătura cu alanti autorităţ a statlui, că născănti direcţii di modernizari tru aestă dumeni caftă alăxearea a nomlui. Iara prezidentulu ali Analtă Curti di Casaţie şi Justiţie (ÎCCJ), Corina-Alina Corbu, lugurseaşti că Justiţia ari ananghi ma multu ca vărnăoară di echilibru și caftă a componentiloru ditu sistemlu judiciar s’părăstisească a societatillei obiectivili comuni, acă ari născănti inerenti divergenţi cari iesu tu videală tru născănti temi.
Autoru:Corina Cristea
Armânipsearea: Taşcu Lala