Timişoara, Capitală Europeană a Culturăllei 2023
Timişoara, agiumtă ofiţial Capitală Europeană a Culturăllei 2023, mutreaşti cu pistipseari cătă spectacolu impresionant cari va syină până tru şcurtu anlu yinitor.
Corina Cristea, 20.02.2023, 18:26
Capitală Europeană a Culturăllei 2023 — deadunu cu căsăbadzlli Veszprém ditu Ungaria şi Elefsina ditu Grecia – Timişoara, ditu vestul a Româniillei, deadi startul a manifestărilor tru weekendul aestu. Chiro di trei dzăli, fură organizate 130 di acţiuni culturale, la cari loară parti 500 di artişti ditu văsilie şi ditu xinătati. Aproapea 15.000 di spectatori şi cama di 100 di oficiali di rang analtu, reprezentânda pisti 40 di văsilii di pe trei continente, loară parti la evenimente. Timişoara s-alăxi tru ună imensă galerie di artă, cu multi expoziţii colective şi personale. Tutunăoară, s’ţănură concerte di muzică, spectacole di teatru, film şi stradale cu cucli babageani, debaturi tru comunitate, un festival di cultură digitală, inaugurarea a unei instalaţii cu 5 patomati tru Piaţa Victoriillei, cu 1.300 di plante, loc di belvedere şi di educaţie ti biodiversitate, cum şi ună lansare di carte ti dzuua marilui sculptor Constantin Brâncuşi. Artistul Dan Perjovschi ş-prezentă expoziţia pi arăhoati – un tramvai decorat cu diseamni şi mesaje vărtosu ancorate tru bana suţială, politică şi culturală contemporană. “Easti zborlu ti ună expoziţie cari numata aşteaptă ca lumea s’yină, căţe iase ea la oamiñi” – exighisi artistul, cari spune că idheea ălli vini ditu vrearea tra s’părăstisească lucrări şi a publiclui cari nu intră multu di multu tru muzee.
Anamisa di nai ma interesante evenimente s’arădăpsescu și vernisajul a expoziţiillei artistului român Victor Brauner, aesta hiind prima retrospectivă organizată tru văsilia iu s’amintă. Reflectoarele a grandioslui spectacol di trei dzăli s-asteasiră aproapea di ñieadzănoapti, ama cortina armâni ridicată, di itia că Timişoara – Capitală Culturală Europeană easti tu ahurhită, spun organizatorlli. Tru bitisita a programului inaugural, primarlu Dominic Fritz declară că Timişoara dimăndă cu multu curayiu mesajlu a llei tru aest weekend. “Valorli cari lu construiră aestu căsăbă – inovari, multiculturalitate, diversitate — eara vidzuti şi avdzăti di tută Europă”, spusi aesta. “Timişoara, agiumtă oficial Capitală Europeană a Culturăllei 2023, mutreaşti cu pistipseari cătă spectacolu impresionant cari va s’yină până tru şcurtu anlu yinitoru, adăvgă el – suntu programate pisti 1.000 di evenimente, cu un mesaj internaţional ti valorli culturale a căsăbălui, dimăndatu di sutili di diplomaţ şi jurnalişti cari fură deadunu tru aestu weekend, ama şi di aţelli aproapea ună miliuni di vizitatori cari suntu aştiptaţ tru dicursu di un an. Timişoara ari nica multi ti yilipseari şi tută lumea easti aştiptată cu braţili dişcllisi.”Prezentă la manifestărli inaugurali, comisarlu european Adina Vălean durusi a Timişoarăllei premiul “Melina Mercouri”, tru valoari di 1,5 miliuñi di euro, dat a căsăbadzloru capitale culturale europene cari ş’tiñisiră angajamentele loati tru program.
Autoru: Corina Cristea
Armânipsearia: Taşcu Lala
