Ti va s’adrămu dupu catastisea di ananghi ?
Dupu creaștirea-a cazurlor di infectari cu COVID-19 tru România, caplu a statlui, Klaus Iohannis, apufusi, tu 16 di marțu, protlu decretu mutrindalui bâgarea-a catastisillei di ananghi ti 30 di dzâli, cari fu prilundzitâ până tu giumitatea-a a meslui ți yini. Cum va s’hibâ bana dupâ 15 di mai? Tru unâ lungă conferință di presă ți u țânu marțâ, prezidentul dimândă că, stămâna yinitoari, va s’apufuseascâ desi catastisea di ananghi va s’armânâ ș’ma largu icâ va s’hibâ alâxitâ cu altâ apofasi administrativă cari s’da izini țânearea tu practico nâscânti ditu restricţiili di tora. Apofasea va u llia autoritătli andicra di cum va s’ducâ epidemia COVID-19 tru cratu. Klaus Iohannis feați timbihi câ piriclliul nica nu tricu, numirlu maximu a infectărilor cu năulu coronavirus nu fu agiumtu, a deapoa, acși, unâ hâbiniseari ninti di kiro/ primaturu va s’hibâ alâthusitâ şi poati s’aspargâ tuti rezultatili amintati pânâ tora. Caplu a statlui zburâ ti atea ți va s’hibâ dupu 15 di mai, cându restricțiile pot s’hibâ scoasi preayalea-aayalea, ma, feați timbihi câ hâbinisearea-a meatrilor nu nsimneadzâ turnarea la bânaticlu di ma ninti di pandemie, a deapoa borgea lipseaști s-u-aibâ cetățeanilli.
Leyla Cheamil, 29.04.2020, 18:04
Ia ți spusi Klaus Iohannis: “Va s-a-rmânâ tu lucru multi ditu rstricţiili di tora, acși nu va s’putem s’nâ adunămu tu parei ma multu di trei inși, acși, un kiro nu va s’putem s’ișimu ti paradigmâ, s’nidzemu la restaurantu icâ la mall. Nu va s’putemu, unâ ș-unâ dupu 15 di mai, s’fudzimu ditu localitati, maș cara va s’avemu unâ furñie salami.” Tut ma mulțâ experțâ nâ spunu că nu va s’ascâpămu di virus şi lipseaști s’aflămu ună turlie di bânaticu cu aestu virus, feați timbiihi caplu a statlui. Mărli festivaluri nu va s’țânâ, vahi anlu aestu cundille nâsu, a deapoa anda yiini zborlu ti competiţiili sportive, ma s’ahurheascâ diznău, ari unâ mari câbili ta s’dizvârteascâ, ama nu spectatorlli. Tutunâoarâ, ma largu va s’hibâ ananghi s’purtămu masca di protecție tru spațiile publiți ncllisi și tru șingirlu di transportu n’comunu.
A ațiloru ți va s’intrâ tu unităţli comerciale, icunomiți icâ di statu va lâ si misoarâ temperatura, tra s’nu aibâ izini s’treacâ ma largu oamiñilli lândziț, câțe eali suntu cadealihea un piriclliu, cundille caplu a statlui. Di altâ parti, prezidentul Klaus Iohannis spusi că născânti producţii di echipamente medicale lipseaști s’ahurheascâ diznău tru România și că ti bunu va s’hibâ alidzearea-a nâscântoru comati di thimelliu ti unâ producţie naţională icâ europeană di echipamente medicale. El lugurseaști câ lipseaști s’ahurheascâ unâ xanamindueari și ndridzeari a șingiriloru icunomiți, a șingiriloru di producţie, și acși, nu lipseaști cathi unu cratu s’adarâ cathi unâ piesă, ama lipseaști s’aibâ tu videalâ câ tru Uniunea Europeană ari facilităţi di producţie aclo iu s’adarâ unâ producţie strateghică. “Escu cândâsitu că va s’hibâ duri antreprenorlli româñi cari va s’dukeascâ câ vini oara s’adarâ şi s’vindâ pârmâtii cari tru añilli ditu soni, di len turlii di itii/furñii, nu mata s’adrarâ la noi, ti paradigmâ cânâscuta mascâ, nica spusi statlui.
Ngrâpsearea: Leyla Cheamil
Armânipsearea: Tașcu Lala
