Sţena politică după alidzeri
Iruşea a partidilor eurosţeptiţe, a aţilor anti-sistem, di extremă-dreapta şi extremă-stânga, tru Parlamentul European, dupâ aţeali dit soni alidzeri scoasirâ tru migdani unâ undâ di şoc si adusi gâilipseari tru canţelariile occidentali. Amintaticlu a Frontului Naţional, di extremâ dreapta, tru Franţa şi a formaţiunilei antieuropene UKIP tru Marea Britanie, spuni unâ niaprucheari ali UE aşi cum easti ea organizată tora şi a elitilor naţionale ţi suntu la puteari, comenta agenţiile di presă. Câtigursitorl’i contra ali Uniunii Europene ş-criscurâ di dauă ori ş’cama locurli tru Legislativlu comunitar, dupu un vot dat contra ali sirţâl’e şi a şomajlui.
România Internațional, 27.05.2014, 12:40
Rezultatlu a euroscrutinlui zilipsi nica nâ oarâ ananghea a reformilor tru UE, aţea turlie câ aestâ s’hibâ axi s’ cilâstâseascâ ma multu tra s’ndreagâ problemili cari îl’i frimitâ pi oamin’i: locuri di lucru, crişteari economică şi un yinitor ma bun. Liderl’i europeni lipseaşti, pi di altă parti, s’cilâstâseascâ aţea turlie tra s’curmâ iruşea a formaţiunilor eurofobe şi extremisti. Analistul politic Bogdan Chireac spuni că, eurosţeptiţl’i loarâ un avansu la alidzerli europarlamentare, construcţia europeană va s’neaga ninti. El declară la Radio România că rezultatili a scrutinlui suntu şi unâ consecinţă a crizâlei economiţi cabaia mari cu cari s-ampulisi UE.
Ia ti spuni Bogdan Chireac: Acă cetăţen’il’i europeni suntu nifharistusiţ ngeneral di guvernili a lor, di parlamentili a lor, di sistemlu a lor până tru soni, cându omlu şeadi mpadi şi mindueaşti niheamă ducheaşti că nu va tra sâ s’toarnâ la monedili naţionale, la curmarea a libirtatil’ei tra oamin’i, a capitalurlor, a serviţiilor, lucri di thimel’iu prit cari s-thimil’usi Uniunea Europeană. Tutunăoarâ suntu niheamâ kicusiţ pi noi, pi oarfân’il’i dit apiritâ, ama fara furn’ie, câţe nu noi adrăm problemili di aclo, problemili aţeali mări; noi maşi li cundil’em cu isapea”.
România contradzâţi aestâ tendinţă gâilipsitoari ţi s’veadi la nivel european. Cama limbid, nu va s’pitreacâ tru PE niţi un partid di minduitâ populistă icâ xenofobă. Pi di altă parti, apofasea a PNL, protlu partid di opoziţie dit România, tra s’treacâ di la grupul ALDI — Alianţa a Liberalilor şi Democraţlor Europeni — la Partidlu Popular European, tra s’nu acaţâ prezidenţia ali Comisie Europeanâ di cătră Socialişti, scoasi tru migdani cutugurserli a aţilor di ma ninti soţ di familie politică, cari u dukirâ ca unâ purdari a valorlor liberali.
Armânipsearea: Taşcu Lala
