Român’il’i şi Eurobarometrul di opinie
Ştefan Stoica, 06.03.2017, 14:41
Atentatili teroristi cari nu agudira vasilia, ama agudira stati occidentali cum Franţa şi Belgia, migraţia di nafoara a continentului ica iminenta işeari a Regatlui Unit dit bloclu comunitar nu putura sa zdruntina pistipsearea a român’ilor tru Uniunea Europeană. Aesta ma largu easti pisti media continentală (52% andicra di 36%), acă scădzu semnificativ andicra di momentul ali aderari — 1 yinar 2007 — cându eara la cota di 65%. Român’il’i ma largu arman, tru idyiul kiro, cu minduita ti cama multu cu nadii andicra di media tra yinitorlu a Europal’ei, acă şi la aestu capitol eurobarometrul nregistreadză un n’ic recul.
Tru bitisita a anlui 2016, 55% dit români sa spusira tra aprukearea ali moneda unica euro, ca simbol a Uniunil’ei Economiti şi Monetari Europeani, a deapoa 62% dit conaţionali lugursescu piaţa unică digitală şi importanţa economică a aistei. Di altă parte, 58% dit români suntu ma haristusiţ di turlia tru cari democraţia lucreadza tru UE andicra di cetăţean’il’i a alantor stati membre, tru condiţiile tru cari masi un di trei easti haristusit di calitatea a aistei tru România. Eurobarometrul nica yilipseasti că andruparea a priorităţlor ali UE armâni tru scara analta tru arada a românilor, cu valori anamisa di 55% tru atea ti mutreasti Uniunea Economică şi Monetară şi 77% tra libira urdinari a persoanilor, respectiv ndreptul tra s-baneadza, s-lucreadza ica tra studiu tru iti stat membru.
Doi di trei români lugursescu că boatea ali Uniuni Europeani angreaca pi plan mondial şi sa spuni tra apruchearea a unei politica externa comuna. Valorli cari reprezintă nai cama ghini Uniunea Europeană suntu, tru minduita a lor, ndrepturli a omlui, democraţia şi irin’ea. Român’il’i lugursescu că geografia easti nai cama bunlu aloat tra sentimentul di comunitati anamisa di cetăţean’il’i european’i, deapoa tin’isearea a statlui di drept şi solidaritatea cu regiun’ili ma oarfani. Tifrili a Eurobarometrului spun că român’il’i s-aradapsescu, ma largu, anamisa di suporterl’i a proiectului european, cu buni ş-cu aralili a l’ei, cu crizili tut ma frecventi şi provocărli salami a curi Uniunea lipseasti s-la da apandisi.
România easti afirită, toradioară, di goada a curentilor populiste, eurosceptiti ica eurofobi. Lucarli pot sa s-alaxeasca, ama, cara vasilia va-si yina tru ori dinintea a nascantor scenarii cu finalitati incertă cata cum atel a unei Europa cu ma multi vitezi, ti nu easti aprucheata ici Bucureşti. Brexitlu şi tendinţili tentrifudzi ti s-vidzura tru stati importante ntimil’eadză urgenţa tra debatlu pi tema a yinitorlui ali Uniuni. Ghini ma, eventuali apofasi ti va s-l’ia pi ayun’ie cari pot s-duca la marginalizarea a nascantor dit arada a statilor membri baga tru piricl’iu s-crească cabaia multu nipistipsearea tru proiectul comunitar la nivelu a cetăţean’ilor a aistor, nica si a român’ilor.
Autor: Ştefan Stoica
Armanipsearea: Tascu Lala
