Romania- Moldova, unâ ligâturâ maturâ şi concretâ
Premierlu a Ripublicâl’ei Moldova, Iurie Leanca feaţi, marţâ, unâ vizita-napandica tu România, prota di anda fu aleptu tu hearea di cap a guvernului di Chişinău. El s-andâmusi, Bucureşti, cu omologlu a lui româ, Victor Ponta, pi cari âlu câlisi ta s-‘liaparti, la 27 di agustu, cându easti yiurtusitâ independenţa a Ripublicâl’ei Moldova andicra di atea di ma ninti URSS (tu 1991), la ahurhearea a lucrărlor di construcţie a gazoductului Iaşi (Romania)-Ungheni (Republica Moldova). La evenimentu va s-l’ia parti şi Guenther Oettinger, comisarlu european ti energie.
Valentin Țigău, 10.07.2013, 15:41
Ia ţi spusi Iurie Leanca : “Escu cândâsitu câ moeabeţli ţi li avum va nâ da izini ca tu 27 di agustu, atumtea cându va s-yiurtusim, Chişinău, Dzuua a Independenţâl’ei, deadun cu domnul prim-ministru ş-cu vinita a comisarlui UE ti energie, s-putem s-dişcl’idem constructia-a gazoductului Iasi – Ungheni”. Pi ningâ interconectarea energheticâ moldo-românâ, cari va s-da cali ti Ripublica Moldova la unâ alternativâ trâ izvurli di energie dit spaţiul CSI, aţel’i doi demnitari zburârâ ş-ti znuearea a niscântor apunţâ pisti sinurlu cu arâulu Prut, apunţâ ţi furâ asparti tu doilu polim mondial.
Proiectili pi aestă temă pot s-hibâ analizate ş-tu unâ yinitoari andamusi di lucru deadun a guvernilor di Bucureşti şi Chişinău. Si maca dusirâ ma largu un deziderat a ligâturlor bilaterali frâţeşti (Republica Moldova, cu unâ populatie dit cari 65% suntu etniţ romani, reprezintâ, vârâ turlie, teritoriul ali provinţie istoricâ romaneascâ Basarabia), premierl’ii Ponta si Leanca agiumsirâ s-hibâ simfun’I că ligâtura anamisa di Romania si Ripublica Moldova lipseaşti s-treaca di catastisea a declaratiilor muşeati, ţi daima eara griti tu 20 lji an’i dit soni, dimec s-treacâ la lucri salami. Di altâ parti, seflu a Executivlui di Bucuresti nâpoi adusi aminti agiutorlu susto ali Românie ti obiectivili di integrari europeanâ ali Ripublicâ Moldova.
Diznău, cu minduita a dumniil’ei a lui premierlu Victor Ponta: ”Summitlu UE di Vilnius, dit aestâ toamnâ, va s-hibâ un momentu multu di simasie şi escu pân di mardzinâ cândâsitu câ ti Ripublica Moldova apofasili ţi s-loarâ aclo di partea UE va s-hibâ apofasili nai ma buni. “La summitlu dit capitala ali Lituanie, Ripublica Moldova aşteaptă vulusearea a ahicâsearil’ei di asocieri la UE şi fâtearea moeabeti ti naua hopâ mutrindalui liberalizarea-a regimlui di vizi cu Uniunea. Aşi cum spun doil’i premieri, moeabeţli di Bucuresti furâ pragmatiţi şi scoasirâ tu videalâ existenta-a nâscântor luri comuni cari va s-hibâ ma largu la thimel’ilu, a ligâturlor anamisa di ateali dauâ stati.
