Rezultati icunumiţi hairlatiti
Prit buget general anvartusit s-achicaseasti singirlu a bugetilor componenti a sistemlui bugetar. Tu ti mutreasti execuţia bugetară, aesta reprezintâ activitatea di adunari a amintatitlor bugetari şi di palteari a hargilor aprucheati si vulusiti tru buget. Unaoara ateali daua zboara zurapsiti, Ministerlu di Finanţi di Bucureşti dimanda, luni, că execuţia a bugetlui general anvartusit ali Românie s-bitisi, tru insita a a meslui yismaciuni, cu un excedentu di 0,06% dit Produslu internu brut. Tru contextul a unei paritati leu-euro di aproapea 4,5, amintatitli ti au una tin’ie di 155,4 miliardi di lei, reprezentândalui 23,5% dit PIB, fura cu 5,5% ma mari tru termen’i nominali andicra di idyiul chiro a anlui ti tricu. S-agiumsi pi una creastiri la adunarea paradzlor dit contribuţiili di asiguripseri sutiali, accize, impoziti şi taxi pi nicuchirata ş-pi ufilisearea a bunurlor, impozit pi profit ica TVA.
![Rezultati icunumiţi hairlatiti Rezultati icunumiţi hairlatiti](https://www.rri.ro/wp-content/uploads/2023/10/grafic-economie-640.png)
Roxana Vasile, 28.10.2014, 13:28
Rezultatlu fu influenţat, tutunaoara, di adunarea a amintatitlor dit certificatili tra emisiili di gazi cu efectu di seră apufusiti di Ministerlu ali Economie, cata cum şi di tranşa a doaua dit impozitlu pi construcţii spetiali. Paradzl’i loat di la Uniunea Europeană tru contul a palterlor efectuati înreghistreadză ma largu un nivel relativ scădzut, reprezentândalui 0,8% dit PIB, ama suntu, şi eali, cu 9,6% ma mari andicra di idyiul chiro a anlui 2013. Tu ti mutreasti hargili, fapti isapi la 155 miliardi di lei, aesti s-n’icsurara tru termen’i nominali, cu 0,3% andicra di idyiul chiro a anlui ti tricu, ama ş-tru termen’i reali, hiindalui ma nghios cu 1,3 puncti protentuali ca fortuma tru PIB. Criscura hargili di personal di furn’ia a criştearil’ei la tin’ia di cafi mes nai cama n’ica bruta la 850 di lei, di la 1 di yinar 2014, şi la 900 lei, di la 1 alunar 2014. S-nreghistra, ama, n’icsurarea a hargilor cu tocurli, catacum şi a atilor cu bunuri şi servitii. Hargili tra investiţii, cari acata tru isapi hargili di capital, cata cum şi ateali aferenti cu programili di dizvultari finanţati dit izvuri interne şi externi, fura di 16,5 miliardi di lei, respectiv di 2,5% dit PIB, andicra di 19,4 miliardi di lei tru idyiul chiro a anlui ti tricu.
Tru un zbor, specialiştil’i ved tru actualu contextu economico-financiar una catastisi favorabilă cari va s-da izini ali Românie s-hiba tru mardzin’ili a scupolui di ixichi di 2,2% dit PIB pi ansamblu a anlui 2014, aşi cum s-agiumsi pi achicaseari, tru prealabil, cu Fondul Monetar Internaţional. Aesta după ti România bitisi 2013 cu un deficit a bugetlui general consolidat di 2,5%. Autorităţli di Bucureşti au nadie că prit tanearea tru idyea scara a praxil’ei fiscala, coroborată cu una ţintă di creaştiri economică di 5-6% tru an, România va s-poata, cu chirolu, s-anvaleasca decalajlu ti u amparti di vasiliili dizvultati ali Uniuni Europeana.
Armanipsearea: Tascu Lala