Revolta dit Ucraina
Bogdan Matei, 19.02.2014, 11:16
Dupâ îndauâ stâmân’i cându s-pârea că vini niham arâhatea, cându pira a niachicâserlor ardea ma pţân, Ucraina iara luă foc. Alumtili di Kiev, dintrâ manifestanţâl’ii pro-europen’i şi poliţia a regimului filorus a prezidentului Viktor Ianukovici, ari baia victimi di dauli pârţâ. Zurbâlâchea ţi ahurhi stâmâna aestâ, easti fârâ preacl’i, dzâsirâ analişţâl’ii, tu aeşţâ 23 di an’i cari tricurâ di cându s-asparsi Uniunea Sovieticâ, Kievlu şi-a aspusi independenţa. Aşi cum s-aştipta, protili furâ regiunili dit vestul ali vâsâlii, fief a naţionalişţâlor ţi u vor Arusia.
Di totna anamisa di Arusii, estul şi sudlu ali Ucrainâ şed, unâ ninga aşantâ, cama arâhati, ama lideril’ii di aclo îi caftâ a prezidentului s-li’a meatri susto ta s-dânâseascâ zurbâlâchea. Alumtili cari dispartu Ucraina întrâ estu şi vestu, întrâ pro-ocţidentali şi rusofili, întrâ protestatari şi poliţişţâ fârâ n’ilâ crescu di la unâ sâhati la alantâ. Şi cându ei s-vatamâ pi sucăchi, politicien’ii nu au puteari s-aflâ unâ formulâ di vârâ achicâseari, iara pâzâripserli” a lor armân fara ţiva, fârâ niţi un rezultat. Fârâ puteari şi îndârsiţ di ahântâ urâ tu Ucraina, cancelarl’ii diplomatiţ pot s-caftâ maşi arâhati, angâtan şi minti. SUA nu apruchie ici alumtili di dauli pârţâ, ama dzâsirâ câ borgea ti arâhati easti a guvernului. Ti aestâ furn’ii, viţeprezidentul american, Joi Biden, îi câftă al Ianukovici s-tragâ nâpoi pâliţia. Şefa ali diplomaţii europeanâ, Catherini Ashton, s-aspusi cu mari gaile mutrinda zurbâlâchea şi dzâsi iara că Bruxelleslu easti etim s-agiutâ cum poati. Bucureşti, gailelu easti pisti tut. Şi easti legitimâ, câ ţe România amparti cu Ucraina îndauâ suti di kilometri di sinuri, iara român’ii di aclo suntu vârâ giumitati n’ilion di sufliti. Ministrul di Externi, Titus Corlăţean, câftă şi el dânâsearea a alumtilor.
Şi prezidentul Traian Băsescu îi câftă al Ianukovici s-nu ufiliseascâ forţa cu protestatarl’ii. La Revoluţia anticomunistâ dit 1989, România tricu prit mari zurbâlâchi, cându cama di unâ n’ii di oamin’i ş-chirurâ bana tu alumta ti libirtati şi democraţii. Anviţăm atunţea că alumta nu easti ici bunâ şi că opţiun’ili lipsescu câftati prit unâ moaubeti di turlii democraticâ” – îi dzâsi prezidentul român a omologlui a lui dit Ucraina viţinâ.
