Republica Moldova ari ananghi di agiutorlu şi experienţa ali Românie

Băgată pi ipotisi meslu ţi tricu, naua şefă a Guvernului ali Ripublica Moldova, Maia Sandu, feaţi, marţă, Bucureşti prota a l’ei vizită externă. Lucărlu easti cu ahătu ma yilipsitor cu cât, iniţial, avea spusă că va s-ducă prota Bruxelles. Tru Ripublica Moldova, thimil’iusită pi ună parti a teritoriilor româneşti dit apirită arăchiti, tru 1940, di Uniunea Sovietică, dupu un ultimatum, băneadză şi ază trei miliun’i di sufliti ţi zburăscu româna. Ună miliuni di aeşţă au şi cetăţenia română. Cându, tru 27 di agustu 1991, Chişinăulu ş-proclamă independenţa andicra di Moscova, România fu prota văsilie dit lumi cari, tru idyea dzuuă, pricunuscu statalitatea a năului a l’ei viţin. Ma amănat, chiro di trei dechenii, Bucureştiul fu nai ma energhic şi consecventu ţi andrupă independenţa, integritatea teritorială şi nădiili europeani ali Ripublica Moldova. A deapoa tora, pricunoaşti premierlu Sandu, aestă ari ananghi di agiutorlu şi experienţa ali Românie tru domeniile economic, ali administraţie publică şi ti anvărtuşearea a statlui di dreptu.

Bogdan Matei, 03.07.2019, 13:07

Tru ună intervenţie telefonică nyie la Radio România, ea declară: Zburămu ti proiecte tru dizvărteari. Vrem multu di multu s-nidzem ninti cu aesti proiecte, indiferent desi zburăm di sectorlu energetic, di educaţie, di proiecte tră fise şi alăxeri climatiţi. Fumu astiptaţ cu căldură şi nă hărsimu că putem s-dutem ma largu aestu lucru deadun şi putem s-avem besă pi agiutorlu ali Românie tru aestă situaţie nu dip lişoară tră Republica Moldova, cându minduim s-reconstruim statlu Ripublica Moldova, minduim s-construim un statu di dreptu, s-eliberăm dit captivitate instituţiili a statlui, s-li dăm diznău a cetăţen’ilor.”

România fu, easti şi va va s-hibă nai ma constantu şi dedicat ţi andrupaşti Ripublica Moldova — ăl’i declară prezidentul Klaus Iohannis a premierlui Sandu. El tăxi că Bucureştiul va s-ndrupască deblocarea ali asistenţă financiară europeană, anănghisită tră dutearea ma largu a reformilor di Chişinău, şi spusi că: Administraţia prezidenţială ari pitricută a Guvernului ali Românie pripunirea ti adrari ună parei di experţă dit ministerele relevante, cari deadun cu experţăl’i alepţă di Guvernul ali Ripublica Moldova s-află ntrăoară domeniile tru cari easti ananghi di ahtari asistenţă, iara pi baza aiştei nchisită s-ahurhească proiecte concrete.”

Premierlu ali Ripublica Moldova nica s-adună Bucureşti cu omologlu a lui, Viorica Dăncilă, şi cu prezidentăl’i a aţilor dauă camere a Parlamentului, Călin Popescu-Tăriceanu şi Marcel Ciolacu. Vizita a lui fu prefaţată, luni, di atea a ministrului a lui di externe, Nicolae Popescu, cari spusi că Ripublica Moldova easti susta şi ireversibil ligată di spaţiul european. “Anlu ţi tricu, 68% dit exporturli ali Ripublica Moldova dusiră cătă Uniunea Europeană; cama di 20% dit exporturli ali Ripublica Moldova viniră tru România” — spusi şeflu ali diplomaţie di Chişinău.

Autor: Bogdan Matei

Armânipsearea: Taşcu Lala