Reguli năi ti transportatorlli di părmătii
Transportatorlli di părmătii cari lucreadză tru văsiliili membre ale Uniunii Europene suntu obligaț s’tiñisească, di luni, niscănti reguli incluse tru pruviderli a Pachetului Mobilitate. Ase, firmele lipseaşti ş’aducă acasă camioanele unăoară la cathi doi meşi, aţea ţi nsimneadză, lugursescu aeşti, consum di carburantu, poluare şi săhăţ kiruti tru dirveñi, maxusu tră firmele di profil ditu estul a Europăllei, impliţit ditu România. Năile misuri fură apufusiti nica di aoa şi doi ani și s’loară, uidisitu cu forurli europene, ca şoferllii s’aibă hăiri di ma multi ndrepturi.
Daniela Budu, 21.02.2022, 17:36
România, deadunu cu alte state, contestă Pachetul Mobilitate la Curtea di Justiţie a Uniunillei, spunănda că misura easti tru contradicţie cu politica europeană di decarbonizare şi zñiipseaşti libira urdinari a părmătiilor. Uidisitu cu minduita ali Românie, ama și aţeali 8 state ditu Uniunea Europeană, ntră cari Bulgaria, Cipru, Lituania, Polonia și Ungaria, noua turlie a Pachetului Mobilitate va s’ducă la creaștirea-a numirlui di “curse goale” cari va să scoată tu migdani emisii suplimentare di dioxid di carbon. Ma multu, turnarea la văsilia di origine la cathi doi meşi echivaleadză cu ună ñille di camioane ma multu ndzuuă pe călliurli europene și la sinuri, fără niţi ună justificari economică.
Ună ş-ună după aprobarea a Pachetlui Mobilitate, aoa şi doi ani, un studiu a firmăllei di consultanță și audit KPMG estima ună ñicurari a veniturilor ditu transporturli internaționale di părmătii tră firmele românești cu 4,5 miliardi di euro și riscul di relocari a emburlăkillei. ,,Studiul KPMG evidințiadză faptul că aplicarea a misurălleii ti turnarea acasă a camioanelor la opt stămâni va s’ducă la ună scădeare cu 4,5 miliardi di euro a veniturilor ditu transportul internațional di părmătie, estimânda, tutunăoară că, pisti 50% ditu transportatorllii români cari opereadză transporturi rutiere internaționale tru UE, cross tradi și cabotaj, ică va ş-dănăsească activitatea ică va ş-mută centrul opearațional tru alte state membre” – spuni un comunicat a Uniunillei Naționale a Transportatorilor Rutieri ditu România (UNTRR). Turnarea a camioanelor acasă unăoară la doi meşi s’bagă tu practico, după ţi, tu ahurhita-a meslui intră pi lucru și Directiva Detașarillei șoferlor tră firmele cari disvărtescu operațiuni di turlia cross-tradi i cabotaj (transport anamisa di dauă state membre, diferite di văsilia di nregistrare a firmăllei), dzăţ di ñilli di șoferi români hiinda implicaț tru aestă activitate.
Uidisitu cu Uniunea Națională a Transportatorilor Rutieri ditu România, Bucureștiul easti pi loclu 8 ca piață di transportu tru UE și a treia poziție la operațiuni di transportu rutieru internațional di turlia cross tradi și cabotaj. Datile ofiţiale spunu că Transportul rutier aduţi aproximativ 5% ditu PIB-ul României, hiinda principalul contributor la exportul di serviţii a văsiliillei – 22 di miliardi di euro tru patrulli ani ditu soni. Dupu aţeali ditu soni iski, tru aistu kiro ari 36.000 di firme active tru transporturi tru România, cu aproximativ 250.000 di șoferi profesioniști.
Autor: Daniela Budu
Armânipsearia: Taşcu Lala
