Reacţii româneşti la caftarli a transnistrean’ilor
Caftarea a deputaţlor di Tiraspol ti alichirea ali Transnistrie la Federaţia Rusă nu ari un caracter di nautati. După 1990, cându işi, unilatearal, dit componenţa ali Rep. Moldova, eara fapti ahtari caftari pitricuti a Dumal’ei Rusa, cari, tru una rezoluţie dit 1999, numasea Transnistria “zonă di sinfer strategic” tra Moscova. Tru 2006, un referendum lu spusi limbid aestu deziderat a banatorlor majoritar rusofoni dit regiunea autonomă. Aca vidzu zori cu normili a dreptului internaţional, Moscova nu ş-alaxi, ama, minduita ufitială, caftandalui pazarapseri tru pareia 5 si nica 2 cari s-da un statut spetial tra Transnistria, tru componenţa a Rep. Moldova.
Valentin Țigău, 17.04.2014, 12:36
Tru naili condiţii tru cari Ucraina fu destabilizată prit alichearea ali Crimee şi prit isearea tru migdani a nascantor fucurini federaliste la sinurlu di Apirita cu Federaţia Rusă şi tru reghiunea Odesa – la Amarea Lae, caftarea ali Transnistrie canda easti una piesă dit un puzzle di piricl’iu. Tru una prota reacţie, guvernul ali Rep. Moldova cutugursi votlu di Tiraspol, lugursindalui una nitin’seari fapta ti proceslu di reglementari a conflictului transnistrean şi a integritatil’ei teritoriala ali Rep. Moldova. Asi cum pitreati habarea corespondentul Radio România aflat Chişinău, primlu ministru moldovean Iurie Leancă lugurseasti votlu ca hiindalui una acţiune unilatearală şi contraproductivă.
Ia ti spuni Iurie Leancă: “Goala cale ti aflarea a unal’ei cearei finala şi viabila tra conflictul transnistrean easti dutearea ma largu a dialoglui politic, fără alti caftari, tru arada a tutulor mecanismilor existenti di pazarapseari.” Cara, Chişinău, majoritatea a oamin’ilor politit, nica si comuniştil’i, lugursescu că Moscova nu va s-da cali ti caftarea a Tiraspolui, Bucureşti, cilastsearea andicra di un ahtari stenariu aduti multă niifharistuseari, tru contextul tru cari România easti şi protlu ti andrupasti integrarea europeana a Rep. Moldova, integrari condiţionată di ndridzearea a problemal’ei transnitreana.
U spuni caplu a statlui, Traian Băsescu: “Noi u minam tuta diplomaţia, cu furn’ia ca nauntrul a aistui Acordu di Asociere UE-Rep.Moldova, cari va s-hiba votat di Parlamentul European, să s-da şi una perspectivă di integrare europeană a Moldoval’ei. Poati s-hiba pazarapsit, iti lucru s-va, mas ca nu s-poate tra s-intra tru UE cu un conflictu ngl’itat pi teritoriul isis.”
Dinintea a aistei catastisi, spuni şi ministurlu român di Externe, Titus Corlăţean, easti ananghi sa s-minteasca ntraoara prezidenti’a ali OSCE, ti furn’ia ca iniţiativi cata cum ateali a legislativlui di Tiraspol yin tru contradicţie cu printipiul di thimel’iu tra ndridzearea pi cali politică a problemal’ei transnistreana.
Armanipsearea: Tascu Lala
