Protili lucri ti adrari tu naua sesiuni parlamentarâ
Ştiut ca prot lucru ti mutreari, năulu Cod Fiscal dişclidi agenda a sesiunâlei di toamnâ a legislativului român. Nica di stâmâna ţi tricu, liderlii politiţ apufusirâ ca actul s-hibâ apruchiat tu turlia di prota oarâ, apruchiatâ deja tu Parlamentu nâinti cu doi meşi, ama nâscânti meatri va s-hibâ bâgati tu practico niham câti niham.
Corina Cristea, 01.09.2015, 12:47
Prota meatrâ mutreaşti scâderea tu dauâ etapi a TVA – la 20% dit Yinaru, anlu ţi yini, şi la 19% ahurhindalui cu anlu 2017. Suprataxa la carburantu şi taxa pi stâlpu armân ti nica un an, ayoriea di cazlu a construcţiilor dit agriculturâ ti cari taxa va s-hibâ scoasâ di anlu ţi yini. Apruchiat dit tuţ parlamentarlii nâinti cu-ndoi meşi, Codlu agiumsi disnău tu Parlamentu hiindalui pitricut di prezidentul Klaus Iohannis, tu minduita a curi bâgarea aluştui tu practico nu easti para bunâ. Calculili aspun că, unâoarâ apruchiati tu legislativ, meatrili dit Codlu Fiscal, anamisa di criştearea a amintatiţlor dit sânâtati, apufusitâ tora ayoniea prit ordonanţâ di urgenţâ, yin cu un defiţit bugetar di vârâ 1,7%. Premierlu Victor Ponta da, ama, asiguripseri că nu va s-hibâ niţi vârâ problemâ, câ ţe impactul bugetar ahurhit di furniea a scâdearâlei TVA va s-hibâ afirit maşi dit nivelu a adunărilor di pâradz la buget.
Nomlu a amintaticlui, ama şi nomlu a votlui prit corespondenţâ icâ aţel a bugetlui suntu proti lucri ti andridzeari. Prezidentul di tora, di oarâ, a protâlei puteari politicâ di Bucureşti, PSD, Liviu Dragnea, hâbârisi că al Valeriu Zgonea, prezidentul a Udălui a Diputaţlor, cumândisearea a partidlui îi câftă s-adarâ, dupu moaubeţ parlamentari, un stog di prinţipii pi temeilu a curi Autoritatea Electoralâ Permanentâ s-ascoatâ unu proiectu ti votlu prit corespondenţâ.
Cum adrarâ ş-tu cazlu a Codlui Fiscal, liderlii a partidilor parlamentari va s-apufuseascâ deadun turlia dit soni a aluştui actu, hâbârisi liderlu soţial-democrat. Dit opoziţii, coprezidentul PNL, Alina Gorghiu, cari caftâ a tutulor partidilor apruchiarea, pânâ la 1 di Brumar a proiectului di nom mutrinda votlu prit corespondenţâ ti românii ditru xeani, minduiaşti că easti adyafuritâ scutearea a unui nău documentu, câ ţe, dzâţi ea, ari deja un ahtari actu ţi fu zburât. Anamisa di aestu proiectu, liberalii mai caftâ ş-alti acti mutrinda înviţâmintul profesional, di mâsturii, icâ un nău sistem di redevenţi.
Pi masa di lucru a parlamentarilor va s-mai agiungâ pripunearea di alâxeari a nomlui mutrinda datilor personali şi afirearea a banâlei di acasâ, ayoriea di aţea de lucru, tu sectorlu a comunicaţiilor electroniţi, ama şi pripunearea legislativâ ti apruchiarea di donaţii ti andruparea a aşcherâlei românâ.
