Protesti antirestricţii tru Europa
“Naua normalitate” cari s-aştirnu unăoară cu pandemia di Covid-19 ari mulţă opozanță tru lumea tută. Cara tru prota parti a crizăllei sanitară ţi nkisi aoa si aproapea doi añi, majoritatea-a oamiñilor tiñisiră restricțiili, născănti multu serti, cu nădia că lucărli va s’yină tru arada di ma ninti, arăvdarea a mulţăloru ahuhri s’keară. Nu maş că pandemia numata tradzi năpoi, ama născănti văsilii ndregu, diznău, alti apofasi serti, niacumtinatu contestati, ditu aestea vaccinarea obligatorie, carantina genearalizată ică ampărţarea pi criterii medicali. Easti cazlu, dimecu, ali Austrie, iu autoritățli dimăndară un arsenalu anti-Covid multu restrictiv. Aţeali aproapea 9 miliuñi di bănători fură consemnati tru casi, di luni, kiro di 20 dzăli, a deapoa, ditu meslu şcurtu, vaccinlu va s’hibă obligatoriu. Carantina va s’bitisească tru 13 di andreu tră persoanili vaccinate și ateali cari tricură pritu lăngoari, ama ma largu va s’bagă tru practico pi vade nedeterminat, ti persoanili nivaccinate. Easti itia tră cari, Viena, tu bitisita-a stămănăllei ţi tricu, dzăţ di ñilli di persoane și spusiră niifharistusearea tru geadei.
Roxana Vasile, 22.11.2021, 08:31
Protesti s’feaţiră şi la Roma. Isihie nu fu niţi Bruxelles, iu dzăţ di ñilli di oamiñni işiră din’casi ta s’mută capua. Născănţă arcară cu petardi și fumigene. Lă si apăndăsi cu tunuri cu apă și gaze lacrimoasi. Manifestația disvărtită sumu grita “Deadunu tră elfterisire” cutugursiră prota ş’prota, faptul că a persoanilor nivaccinate nu lă si da izini s’intră tru restaurante ică baruri. Franța, cari s’ampuliseaşti cu ună creastire a infectărilor, lipseaşti s’kivernisească nica şi catandisili mintiti ditu departamentele a llei di pisti amări – poliția ditu Guadelupa avu ananghi di agiutoru tra s’poată s’ţănă keptu a prişcăviiloru ghenearate di obligativitatea a vaccinarillei personalu medical, iar tru Martinica fu faptă ună acllimari ti grevă genearală.
Acă cu multu ma slabi cantitativ andicra di aţeali ditu ascăpitata ali Europă, niţi tru România nu armasiră geadeili făr di proteasti! Tru sud, Ploieşti, suti di persoane afişară bannere di mari dimensiuni cu mesaje contra a meatriloru di combatere a pandemiillei, iara Craiova, oamiñilli ghivăsiră articole ditu Constituţie mutrinda inviolabilitatea libirtatillei individuale, a siguranţei persoanei, cum şi a libertatillei di exprimare a minduerloru, opiniilor I a pistillei. Tru Sibiu (centru), protestatarii minară hlamburi tricolore şi interpretară cântiţi patriotice. Un protest fu şi Constanţa, pi litoralu la Amarea Lae, contra a obligativitatillei certificatlu veardi.
Autoru: Roxana Vasile
Armânipsearea: Taşcu Lala
