Politica a Bancâl’ei Naţională ali Românie

Banca Naţională ali Românie apufusi nica dit prota andamusi di lucru di estan s-n’icşureadză rezervili minimi obligatorii la lei şi valută şi s-alasă pi pâzari unâ lichiditati ma mari pi lungu chiro, ţi easti anânghisitu ti finanţarea a economiil’ei. Banca ţentrală u duţi ma largu aestâ turlie politica di n’icşurari a toclui di referinţă, apofasi ţi u l’ia tră tinţea oarâ arada, cu scupolu tra s-da silă la ampârmuturi. Valoarea apufusită dupu n’icşurarea cu un cirec di punctu proţentual, di 3,75% tru an, easti un nău minim istoric, a deapoa apofasea fu di câbili tra sâ s-l’ia tru condiţiili di n’icşurari niacumtinată ali inflaţie, spusi guvernatorlu a BNR, Mugur Isărescu.

Corina Cristea, 09.01.2014, 11:47

Banca Naţională ali Românie apufusi nica dit prota andamusi di lucru di estan s-n’icşureadză rezervili minimi obligatorii la lei şi valută şi s-alasă pi pâzari unâ lichiditati ma mari pi lungu chiro, ţi easti anânghisitu ti finanţarea a economiil’ei. Banca ţentrală u duţi ma largu aestâ turlie politica di n’icşurari a toclui di referinţă, apofasi ţi u l’ia tră tinţea oarâ arada, cu scupolu tra s-da silă la ampârmuturi. Valoarea apufusită dupu n’icşurarea cu un cirec di punctu proţentual, di 3,75% tru an, easti un nău minim istoric, a deapoa apofasea fu di câbili tra sâ s-l’ia tru condiţiili di n’icşurari niacumtinată ali inflaţie, spusi guvernatorlu a BNR, Mugur Isărescu.

Dupu minduita al nâsu, tru prota giumitatia aiştui an suntu posibili nica şi valori aprucheati di 1% tră aestu indicator. Tutunâoarâ, furâ n’icşurati şi ratili a rezervilor minimi obligatorii la lei, di la 15 la 12%, şi ratili a rezervilor minimi obligatorii la valută di la 20 la 18%. Aeşţâ suntu pâradzl’i minimi pi cari bănţâli comerciali au borgea tra s-l’i ţânâ la banca ţentrală. Tru aesti condiţii, cantitatea ma mari di lichiditati ţi easti tru nicuchirata a bănţâlor va s-agiutâ, aşi cum spuni Mugur Isărescu, ti ndruparea a proţeslui di mpârmutari. Ti va s-adarâ bănţâli? Mugur Isărescu:

Nâscânti va s-cilâstâseascâ ma multu tră mpârmutari, alti va s-minduească ma multu ti condiţiili di mpârmutari şi vahi va-lu creascâ ritmolu, jgl’ioata cu cari va li da mpârmuturli, va s-mindueascâ diznău şi catastisea a muştiradzlor a lor, alti, cari au borgi ti pâlteari, va ş-facâ isăchili şi va s-pâlteascâ borgili. Nu va vâ dau unâ cali directoari. Tut cu tut, minduescu că easti unâ apofasi pi calea tră darea silâ la mpârmuturi.” Nica dit ahurhita a meslui andreu a anlui ţi tricu, Mugur Isărescu spunea că, ti ndruparea a mpârmutaril’ei, banca ţentrală easti ndreaptâ tra s-n’icşureadză rezervili minimi obligatorii tru 2014 – cari adună aproapea 6 miliardi di euro la valută şi 3-4 miliardi di euro la lei – acă pi pâzarea monetară s-nreghistreadză un exces di lichiditati lugursitu ti aproapea 2 miliardi di euro.

Prit n’icşurarea a rezervilor la valută, bănţâli va s-armânâ cu aproapea 500 di miliun’i di euro pi cari, ma s-nu-l’i pitreacă la bănţâli mamă, va-l’i arucă pi păzari, aestă s-cl’iamâ câ va s-bagâ zori tu noima tră criştearea a tin’iil’ei la moneda naţională, nica spusi Isărescu. Di altă parti, niţi pâradzl’i scoşi tru migdani prit n’icşurarea a rezervilor la lei nu va s-bagă zori pi scâdearea a tin’il’ei la leu, nica cundil’e Mugur Isărescu. Guvernatorlu u spusi, di altă parti, nâdia că apofasea a cumândusearil’ei di la BNR tra s-n’icşureadză rata a toclui di politică monetară nu va li cândâseascâ bănţâli comerciale s-n’icşureadză tocurli la depozitili tru lei.

Autor: Corina Cristea

Armânipsearea: Taşcu Lala