Pâzarea di energii
La nauâ an’i di yinearea tu Românii, unâ dit nai maărli companii xeani, Enel, ieasi di pi pâzarea autohtonâ. Tu anlu 2013, firma italianâ di producţii şi furnizari di energii electricâ avu unâ ţifrâ di afaţeri di 1,1 di miliardi di euro şi un profit di 290 di miloani di euro.
Mihai Pelin, 17.09.2014, 14:33
Ministrul român ali energii, Răzvan Nicolescu, ahurhi, la Roma, moaubeţli cu reprezentanţâl’ii Enel mutrinda vindearea a operaţiun’ilor a ei dit vâsâlia a noastâ. Veara aestâ, italien’ii hâbâriseau că andregu vindearea a activilor tu ţi mutreaşti producţia di energii dit Slovacia şi aţeali di distribuţii şi vindeari dit Românii.
Planlu, dzâc ei, caftâ s-n’icşureadzâ borgea ţi u ari compania, lucru ţi fu ahurhit anlu ţi tricu, 2013. Tu Românii, Enel ancupâră di la stat, tu 2005, companiili di distribuţii şi furnizari – Electrica Banat şi Electrica Dobrogea. Tu 2008, compania luă şi Electrica Muntenia Sud, cari da energii a Bucureştiului.
Răzvan Nicolescu dzâţea tora ayoniea că Enel Dobrogea easti un interes di turlii strategicâ ti vâsâlii şi nu dâdea curagiu a companiilor privati ta s-yinâ cu oferti di ancupârari. Răzvan Nicolescu: Distribuţia easti unâ activitati di turlii strategicâ mutrinda statlu român, maxus tu ţi mutreaşti aţea şi s-faţi tu estul ali Românii; ENEL Dobrogea ari unâ turlii di activitati, cari, uidisit cu analizili a noasti, easti multu ligatâ di sicuritatea naţionalâ ali Românii.
Enel ari, cu tut, tu Românii, unâ cotâ di 34 di proţenti di pâzari di distribuţii şi vârâ 20% dit pâzarea di vinderi. Tu aeşţâ dit soni an’i. pâhălu la energia a gruplui italian criscu, iara ma mulţâ directori aliştei companii suntu tora câftaţi ti aruşfeti.
Pi di altâ parti, Guvernul deadi cali, tu moaubeti publicâ, la proiectul di apofasi mutrinda suspendarea a calendarlui di liberalizari a pâzarâl’ei di gazi. Uidisit cu aestu calendar, ti cari România dâţea că va s-da giuiapi, tu anlu 2012, dinâintea al FMI şi ali Comisii Europeanâ, pâhălu a gazilor ti popul lipsea s-creascâ cu 3% la 1 di Sumedru. Pâzarea româneascâ nu easti ama ietimâ ti liberalizari, dzâc analişţâl’ii, maxus câ Moscova ahurhi s-n’icşureadzâ cantităţli di gazi ţi li pitreaţi câtâ Evropa di Est.
Tu aţea ţi pari s-hibâ un polim a nervilor, Gazprom apufusi, tu dauâ arădzâ, sâ scadâ cantitatea di gaz di Românii. Cathioarâ, ama, mutreaşti iara apofasea ţi u luă. România nu easti goala vâsâlii ţi ari problemi. Tu inşita a stâmânâl’ei ţi tricu, companiili dit aestâ domeni dit Polonia şi Slovacia hâbârisirâ că întreaga cantitati di gazi aruseşţâ fu n’icşuratâ cu 45%, icâ cu 10% andicra di cantităţli ti cari aveau zburâtâ.
