ORDONANȚA MILITARĂ nr. 3 dit 24.03.2020

Ministurlu ti afaceri interne, Marcel Vela, vulusi Ordonanța militară nr. 3 dit 24.03.2020, mutrinda meatri tsi lipseaști s’hibâ loati ta s’nu s’arâspândeascâ COVID-19.

Tașcu Lala, 26.03.2020, 02:24

Avândalui tu videalâ dispozițiili ditu art. 24 a Ordonanțâllei di ananghi a Guvernului nr. 1/1999 mutrindalui reghimlu a catastisillei di asediu și regimlua catastisillei di ananghi, publicată tu Monitorlu Oficial a Româniillei, Partea I, nr. 22 dit 21 di yinaru 1999, vulusitâ cu alâxeri și adâvdzeri prit Nomlu/ Leadzea nr. 453/2004, cu alâxerli și adâvdzerli di ma nâpoi,

Ma s’acâțămu tu isapi evaluarea tsi u adră Comitetlu Național ti Catandisi Spețiale di Ananghi, vulusitâ pritu Apofasea nr. 14 ditu 24.03.2020,

Pi thimellilu art. 4 alin. (2) și (4) dit Decretlu a Prezidentului a Românillei nr.195/2020 mutrindalui apufusearea a catandisillei di ananghi pi livel național, tipusitu tu Monitorlu Ofițial a Româniillei, Partea I, nr. 212 dit 16 di marțu 2020, al pct.1, 3 – 5 dit anexa nr. 2 la idyiul decret și al art. 20 lit. n) dit Ordonanța di ananghi a Guvernului nr.1/1999, cu alâxerli și adâvdzerli di ma nâpoi,

Ministrlu trâ afaceri interni apufuseaști aestâ:

Ordonanță militară

Art. 1. — S’curmã urdinarea a tutâloru oamiñiloru nafoara a casillei/ nicukiratâllei, cu aesti di ma nghiosu excepții:

a) urdinarea cu sinferlu ti duțeari la huzmeti/ profesional, nica și anamisa di casâ/ nicukiratâ și loclu/locârli iu s’dizvârteaști huzmetea profesionalâ shi tu-a-nâpoi;

b) urdinarea trâ asiguripsearea di bunuri cari anvâlescu anânghiserli di bază a oamiñiloru și a prăvdzâloru di companie/domestiți, catacum și bunuri anânghisiti ti dizvârtearea a huzmetillei profesionalâ;

c) urdinarea trâ asistență medicală cari nu poati s’hibâ amânată și niți sâ s’facâ di alargu;

d) urdinarea cu itii/ furñii nthimilleati, catacum mutrearea-a lândzitlui/ nkisearea dedunu cu cilimeanlu, asistența-a oamiñiloru tu ilikie, lândziti I suntu sicaț icâ moartea-a unlui insu ditu taifâ;

e) urdinărli șcurti, aproapea di casâ/nicukiratâ, ligati di huzmetea fizică a cathi unlui insu (cu excludirea-a ițido di activităț sportivi di echipă), ama și trâ anânghiserli a prăvdzăloru di companie/domestiți;

f) urdinarea cu scâpolu ta s’da sândzu, la țentrili di transfuzie sândzagvinâ;

g) urdinarea tu scâpo umanitaru icâ voluntariatu;

h) urdinarea trâ adrarea-a huzmețloru agricoli;

i) urdinarea-a producătorloru agricoli trâ dari-loari produsi agroalimentari.

Art. 2. — Urdinarea-a oamiñiloru cari umplurâ ilikia di 65 di añi, nafoara acasillei/ nicukiratâllei, easti aprukeatâ mași anamisa di oarili 11.00 — 13.00, orlea-zorlea trâ aesti furñii:

a) urdinarea trâ asiguripsearea di bunuri cari anvâlescu anânghiserli di bază a oamiñiloru și a prăvdzâloru di companie/domestiți;

b) urdinarea trâ asistență medicală cari nu poati s’hibâ amnatâ și niți adratâ di alargu;

c) urdinarea di itii nthimilleati, catacum mutrearea-a lândzițloru/ sicațloru/ nkiseari calea cu un nicu, asistența alțâ oamiñi tu ilikie, lândziti icâ sicaț, icâ ari muritâ vârâ om ditu taifâ;

d) urdinări șcurti, apropea di casâ/nicukiratâ, ti huzmetea fizică individuală a oamiñiloru (cu excludirea ițido di huzmeti fizicâ tu parei/ colectivâ), ama și trâ ateali ți au ananghi prăvdzâli di companie/domestiți.

Art. 3. — Urdinarea-a oaminiloru pruvidzuț la art. 2, nafoara-a casillei/ a nicukiratâllei/ poati s’facâ anamisa di oarili 11.00 — 13.00,cara aestâ s’fați cu sinferu ti huzmeti/ profesional icâ ti huzmeț agricoli.

Art. 4. — (1) Trâ verificarea-a itiiloru/ furñiiloru ti cari s’urdinâ:

a) lucrâtorlli lipseaști sâ spunâ legitimația di huzmeti/ lucru icâ adeverința di la angajatoru;

b) persoanili fiziți autorizati, titularlli a ntreprinderloru individuali, membrilli a ntreprinderlor familiali, liber profesionișțâlli și oamiñilli cu huzmeti agricolâ va-s’pârâstiseascâ unâ declarație ti cari va s’da giueapi, ama lipseaști s’hibâ ngrâpsitâ di cu kiro.

(2) Trâ verificari itia/furñia-a urdinarillei tu alti catastisi andicra di ațeali catastisi pruvidzuti la alin.(1), s’pârâstiseasti unâ declarație ti cari va s’da giueapi, ama lipseaști s’hibâ ngrâpsitâ di cu kiro.

(3) Declarația ti cari va s’da giueapi lipseaști s’aibâ ngrâpsitâ numa și paranuma, cându easti faptu, adresa-a casillei, cu ți furñie urdinâ și iu s’duți, data și vula.

(4) Cartea/ Adeverința eliberată di angajator icâ declarație ti cari va s’da giueapi poati s’hibâ pârâstisitâ dinintea-a personalui di la autoritățli axiziti și pritu tilefonu, tabletâ icâ unâ hâlati electronicâ di idyea turlie.

(5) Apofasea s’bagâ tu practico ahurhindalui cu dzuua di 25 di marțu 2020, oara 12.00.

Art. 5. — (1) S’llia meatri ti șidearea ncllisu ncasâ icâ, ma s’hibâ ananghi carantinarea trâ tuț oamiñilli ți intrâ tu România.

(2) Apofasea s’bagã tu practico ahurhindalui cu 25 di marțu 2020, oara 12.00.

Art. 6. — (1) Autoritățili ali administrație publicâ localâ au borgi s’lli-aflâ și s’tânâ isapea-a oaminiloru ți nu au apanghiu, și s’lâ asiguripseascâ apanghi șhi s’lli mutreascâ cu tsi au ananghi.

(2) Isapea cu oamiñilli ți nu au apanghiu s’u’aibâ dzuua di dzuua shi lipseasti s’dimândâ la Centrul județean/a Municipiului București di coordonare și cumânduseari a intervențillei.

(3) Apofasea s’bagâ tu lucru ahurhindalui cu data-a tipusearillei alishtei ordonanțâ militarâ tu Monitorul oficial al Românillei, Partea I.

Art. 7. — (1) Instituțiili publiți și operatorlli econoiț au borgi s’nsimneadza locârli pri iu au izini s-urdinâ cetățeañilli/mushtiradzlli și armanea ti ligâtura cu publiclu/vindeari cu seamni tsi s’vedu cari s’cândâseascâ și s’pitreacâ oaminilli ta s’tiñiseascâ unâ lârdzimi di siggurlâki nai cama ptsânu 1,5 meatri.

(2) Administratorlli z pâărloru agroalimentare au borgi s’ndreagâ lucurlu cu vindearea atea turlie ta s’armânâ și s’tiniseascâ unâ lârdzimi sutialâ anamisa di producătorlli agricoli, comercianțâ și muștiradz. Comercianțâlli și producătorii agricoli ti suntu tu pâzârli agroalimentare au borgi s’llia meatri di aviglleari ta s’nu s’arâspândeascâ COVID-19, dimecu s’poartâ mănuși și masti.

(3) Apofasea s’bagâ tu lucru ahurhindalui cu data-a tipusearillei alishtei ordonanțâ militarâ tu Monitorul oficial al Românillei, Partea I.

Art. 8. — Va s’hibâ curmati tuti azbourli fapti di operatori econoiț aerieni câtâ Franța și Germania și dit Franța și Germania cătâ România, trâ tuti aeroporturle dit România, trâ un kiro di 14 di dzâli.

(2) Apofasea nu s’abagâ tu practico ti azboiurli ți s’afcu cu aeronave di stat, azbzboiurli ți poartâ pârmâtii și corespondență, umanitari i cari asiguripsescu serviții medicale di ananghi, catacum și ti autorizărli tehniți niemborikești.

(3) Apofasea s’bagâ tu lucru ahurhindalui cu data di 25 di marțu 2020, oara 23.00, oara-a Româniillei.

Art. 9. — (1) Nu s’da izini a piloțlor la bordul a aeroplaniloru/ navelor, agiumti ditu locârli di riscu aroși/galbini tu porturle maritime române, ma s’nu aibâ echipamentu di protecție apufusitu di Direcția di sănătate publică Constanța I cara navele nu șidzurâ tu kirolu di carantinare di 14 di dzâli di la atelu ditu soni portu di escală aflatu tu unâ naeauâ/ zonă di riscu aroși/galbină.

(2) Nu s-da izini a pamporiloru maritime și fluvio-maritime tu porturle ți suntu pi Dunarlu maritimu, până va s’facâ și va s’bitiseascâ kirolu di carantinare di 14 di dzâle di la atelu ditu soni portu di escală ți easti tu unâ naeauâ aroși/galbină, tu yinitoarili dauâ năi di aștiptari tu cinghelliu/ ancoră:

a) rada-a portului Sulina, trâ pamporirli cari yin di câtâ Amarea Lae;

b) Dunărea, mila marină 44, trâ pamporili ți yinu di câtâ avlakea/ canalu Bâstroe.

(3) Apofasea s’bagâ tu lucru ahurhindalui cu data-a tipusearillei alishtei ordonanțâ militarâ tu Monitorul oficial a Românillei, Partea I.

Art. 10. — Ministerlu ali Apărari Naționalâ asiguripseaști, cu câftarea-a ministurlui ti lucre di nâuntru/ afaceri interne:

a) priluloarea ti viglleari a nâscâtoru obiective a curi protecție easti asiguripsită tu aestu kiro di cătrâ Jandarmeria Română;

b) personal și hâlăț loghistiți trâ andruparea a huzmețloru tu comata di aradâ publică;

c) hâlăț loghistiți trâ andruparea a huzmețloru loghistiți ți li ari Poliția di Sinuru Românâ, tu locârli di trițeari a sinurloru stat.

Art. 11. — Trâ s’veadâ cum suntu tiñisiti condițiili di carantinari icâ di izolare la domiciliu, instituțiile di securitate națională va s’proiecteadzâ sisteme di comunicații și aplicații informatiți, anânghisiti a Ministerlui Afacerilor Interne, Ministerlui trâ Sănătati și autorităților locali, trâ s’llia di limbâ tu oara ananghi shi niacumtinatu cu inșilli carantinaț icâ izolaț la domiciliu.

Art. 12. — (1) Documentili a curi lâ si bitiseaști vadelu tu kirolu a catadisillei di ananghi, eliberate di autoritățile publiți, pot s-hibâ alâxiti ti un kiro di 90 di dzâli di la data anda s’bitiseaști catandisea di ananghi.

Art. 13. — (1) După arâdârikea (2) a articolui 2 dit Ordonanța militară nr.2/2020 mutrinda meatri di prevenire ta s’nu s’arâspândeascâ COVID -19, publicată tu Monitorlu Oficial a Româniillei, Partea I, nr.232 dit 21 di marțu 2020, s’bagâ unâ nauâ arâdâriki, arâdârikea/ alin.(21), ți spuni ti huzmețli ți au izini ta s’facâ tu dukeñili comerciale, cu aestu ncurpilleaticu:

a) vindearea-a produsilor electroniți și electrocasniți di către operatorlli econoiț cari asiguripsescu livrarea la domiciliul/sediul a cumpărătorului;

b) vindearea a produsilor și serviciilor di optică medicală.”

(2) Meatrile pruvidzuti la alin.(1) s’bagâ tu lucru ahurhinda cu data publicarillei alishtei ordonanțâ militarâ tu Monitorul oficial a Româniillei, Partea I.

Art.14. — (1) Suntu axiziti s-‘asiguripseascâbâgarea tu lucru și tiñisearea a alishtei ordonanțâ militarâ:

a) Poliția Română, Jandarmeria Română și poliția locală trâ meatrile pruvidzute la art.1 – 4;

b) Poliția Română, Jandarmeria Română, poliția locală, Inspectoartlu General trâ Situații di Urgență și structurile subordonate, direcțiile di sănătate publică și conducătorii autorităților administrației publiți locali, trâ apofasea pruvidzută la art.5;

c) Poliția Română, Jandarmeria Română, Poliția locală, Agenția Națională di Administrare Fiscală, Autoritatea Națională trâ Protecția Consumatorlui și conducătorii autorităților administrației publiți locali, trâ apofasea pruvidzută la art.7;

d) Ministerul a Transporturilor, Infrastructurii și Comunicațiilor, trâ apofasea pruvidzută la art.8;

e) Autoritatea Navală Română și direcțiile di sănătate publică, trâ apofasea pruvidzută la art.9.

(2) Nitiñisearea-a meatrilor pruvidzute la art.1 — 5, art. 7 — 9 duți la darea giueapi tu comate disciplinară, țivilă, contravențională i penală, tu simfunie cu pruviderli art.27 dit Ordonanța di ananghi a Guvernului nr.1/1999, cu alâxerli și adâvdzerli di ma nâpoi.

(3) Personalu a instituțiilor pruvidzute la alin.(1) easti axizitu s’veadâ desi suntu contravenții și s-bagâ tu lucru sancțiuni, tu simfunie cu pruviederle art.29 dit Ordonanța di ananghi a Guvernului nr.1/1999, cu alâxerli și adâvdzerli di ma nâpoi.

Art. 15. — (1) Prezenta ordonanță militară s’tipuseasti tu Monitorul Oficial a Româniillei, Partea I.

(2) Pruviderli a art.4 și 5 dit Ordonanța militară nr.2/2020 ș’dânâsescu lucurlu cu bâgarea tu practico.

(3) Furnizorlli di serviții media audiovizuale au borgea ta s’hâbâriseascâ publiclu, prit mesaje difuzate regulat, trâ ma pțânu 2 dzâle di la data a tipusearillei, ti ațeali ți suntu nyrâpsiti tu aestâ ordonanțâ militarâ.

Armânipsearea: Tașcu Lala