N’icşurarea ali fiscalitati

Că România s-arâdâpseasti anamisa di vâsiliili cu nai cama marli numir di taxi numata easti unâ nâutate tră vârnu. Isăchili spun că tru aestu chiro, pi ninga taxili fiscale, ari 364 di taxi parafiscali, chivirnisiti di 24 di instituţii şi reglementati di 215 di acti normative. Spusi câ hiindalui ateali taxi cari nu suntu acâţati tru isapea a Codlui Fiscal, hiindalui apufusiti di instituţiile cari li adună, parafiscalili spun tră taxile di timbru fiscal, taxile di licenţiere tru ma multi dumenii ică tră loarea a nâscântor documente, catacum aţeali di identitate, cazier judiciar icâ fiscal, taxile di fise icâ taxa di autorizari tră serviţii poştale, ti paradigma.

Corina Cristea, 15.05.2014, 15:54

Că România s-arâdâpseasti anamisa di vâsiliili cu nai cama marli numir di taxi numata easti unâ nâutate tră vârnu. Isăchili spun că tru aestu chiro, pi ninga taxili fiscale, ari 364 di taxi parafiscali, chivirnisiti di 24 di instituţii şi reglementati di 215 di acti normative. Spusi câ hiindalui ateali taxi cari nu suntu acâţati tru isapea a Codlui Fiscal, hiindalui apufusiti di instituţiile cari li adună, parafiscalili spun tră taxile di timbru fiscal, taxile di licenţiere tru ma multi dumenii ică tră loarea a nâscântor documente, catacum aţeali di identitate, cazier judiciar icâ fiscal, taxile di fise icâ taxa di autorizari tră serviţii poştale, ti paradigma.

Isăchili spun că, acâ, dupu pâltearea a aiştor taxi s-faţi un serviciu, nivelu a aiştor nu anvâlescu totna hărgili a instituţiilor cari li adunâ, a deapoa autorităţli di Bucureşti apufusiră s-li scoată ică s-li adună stog 27 di taxi şi tarifi nifiscale. Iara prit ordine di ministru, cari va s-hibâ vulusiti concomitentu/ dimi unâ ş-unâ, va s-hibâ n’icşurati tră 65 di taxi şi tarifi parafiscale. Tru aestă stămână, Ministerlu a Finanţilor nchisi tru debat public doauă proiecti tru aestâ noimă, taxile şi tarifele parafiscale avuti tru plan hiindalui apufusiti dupu niscânti consultări cu ma multi ministeri şi instituţii.

Asi cum spuni ministurlu di resortu, Ioana Maria Petrescu, simplificarea a sistemlui di taxi va s-aducâ hâirlaticâ tră contribuabili, cari numata va s-chearâ oara la ghişeu, ama şi tră administraţie, câţe va s-hibâ curmati hărgili di administrare a nâscântor taxi şi tarife cu ncasări n’iţ. Anamisa di taxile şi tarifili cari va s-hibâ curmati s-arâdâpsescu aţeali tră loarea a unâl’ei paşaportâ electronicâ aplo temporarâ icâ a altui documentu di triţeari a sinurlui, aţel di asistenţă tră dişcl’idearea a unei firme, di ufiliseari a procedurâl’ei electronicâ icâ taxa tră darea avizlu tră activităţ tru dumenea a hâlăţlor medicale şi a yitriilor.

Anvâlearea a hărgilor nu easti criteriul gol di analiză a hâirlaticâl’ei tră aesti taxi dit videala ti adunari veniturli. Un altu criteriu easti aţel ţi mutreaşti cât angreacâ aesti tru PIB comparativ cu aţea a alântor venituri fiscali, iara datili spun că aestu protentu easti multu n’ic. Responsabilii tru dumeni spun căţe curmarea icâ adunarea stog a taxilor avuti tru plan di aţeali dauă proiecte va s-aducâ hairi şi dit videala a hărgilor mutrindalui turlia di cum s-lucreadzâ instituţiili a curi prot scupo easti s-li adună, ama şi oarili ţi s-cher icâ hărgili asociate cu birocraţia ţi nu ş-ari hâiri.

Armanipsearea: Tascu Lala

HABARLI:

St.tr.II — inloc. 5/15/2014 6:25:01 PM

XXX — Statele Unite şi Europa featirâ timbihi, azâ ali Rusie câ va-l’i si bagâ năi sancţiuni, ma s-mindueascâ s-minteascâ dizvârtearea a alidzerlor prezidenţiali dit Ucraina dit bitisita a meslui. Hâbarea u feaţi ministurlu britanic di externi, William Hague, după moeabeţli ţi li avu cu secretarlu american di stat John Kerry şi cu aliaţ european’i. Un sondaj dat tru şteari tru Ucraina spuni că maşi un cirec dit alegătorl’i a apiritâl’ei rusofonâ, pradâ ali insurecţie separatistâ, suntu hâzâri s-l’ia parti la prezidenţialili dit 25 di mai. Sondajlu lu spuni miliardarlu pro-occidental Petro Poroşenko tu harea di mari favorit. El andrupâ, unâ turlie dişcl’is contestaţia pro-europeană di Kiev, dit meslu şcurtu, cari dusi la avinarea di la puteari a aţilui di ma ninti prezidentu pro-rus, Victor Ianukovici. Dupu Petro Poroşenko yini dna Iulia Timoşenko, masti emblematică a cumitiil’ei pro-occidentalâ dit 2004, şi di pro-ruslu Serghei Tighipko. Di altâ parti, caplu a diplomaţiil’ei rusi, Serghei Lavrov, declară că Ucraina easti ma aproapea ca vârnâoarâ di un polim ţivil, a deapoa Rusia nu ari naeti ta s-pitreacă ascheri tru aestâ vâsilie.

Autor: Roxana Vasile

Armanipsearea: Tascu Lala