Nicari tru România
Tru România, aproapea tru cafi an, maxus tru ahuhrita a primuvearal’ei, piricl’ul a nicarlor yini diznau tru actualitate. Niti 2014 nu fati excepţie. Tru dzalili dit soni ploiurli cabaia mari adusira tru ndaua jiudeti dit sudlu a vasiliil’ei mari zn’ii. Isapea spuni ti nai putan 4 morta, suti di oamin’i evacuats, suti di casi şi nicuchirati nicati, ama şi multi agari şi dzats di cal’iuri anvaliti di api. Nai cama aguditi fura giudetili Teleorman si Olt, iu hidrologil’i bagara tru practico cod arosu di nicari tra nascanti arâuri.
România Internațional, 23.04.2014, 14:38
Autoritatile centrale s-u danasira mini-vacanta cu furn’ia a Sarbatorlor Pascale si dusira tru ndaua dit localitatile nai cama zn’iipsiti. Tru hoara Beiuş, gideţlu Teleorman, premierlu Victor Ponta, deadun cu ministurlu a Dizvoltaril’ei Regionale şi ali Administraţiei Publica, Liviu Dragnea, ufilisira una varcă pneumatică a pompierlor tra s-agiunga pi sucachili nicati. Ponta intra şi tru casi iu sidzu di zbor cu oamin’il’i cari al’i caftara s-ia apofasi ntraoara tra znuearea a diglui tru zonă. Di la nicarli dit 2005, aeştia tut aşteaptă ca autorităţli s-ahurheasca lucrări di znueari tru zonă.
Ia ti spuni premierlu Victor Ponta:
Vrui tra s-ved cu ocl’i a mel’i cari suntu ceareili ca tru yinitor s-nu s-faca idyea turlie, tra atea că aoa fura nicari şi tru 2005, fura şi tru alţa an’i. Soluţia tehnică an’i fu exighisita di cătra directorlu general di la Apele Române, va s-ahardzim paradzl’i ti suntu ananghi tra lucrărli di sistematizari şi anlu aestu am umutea s-hiba hazari lucrărli, ahtari turlie ca tut ti znuim şi znuescu oamin’il’i, barim să ştiba că znuescu tra multu chiro”.
Primlu-ministru taxi a banatorlor dit zonili nicati că guvernul va la da parmatii di construcţii tra znuearea a casilor si va s-ahardzeasca paradz tra adrarea a nascantor diguri, tra regularizarea a nascantor arâuri, atea turlie ca ahtari fanicadz s-nu s-faca alta oara. Greu agudit tru aesti dzali di zn’iili a ploiurlor cabaia mari suntu şi agricultorl’ii, cari spun ca n’il’i di icctari di agari pot s-hiba asparti tru sudlu a vasiliil’ei, iu mucealea dit loc easti cabaia mari şi s-aşteaptă nai ploiuri.
Tru ahurhita a meslui, Administraţia Naţională Apili Române, spunea că 6% dit populaţia ali Romanie baneadza tru zone cu riscu mari di nicari, furn’e tra cari specialiştil’i ANAR adrara hărţali di hazardu şi piricl’iu la nicari, cari anvalescu 11 di bazine hidrografite dit România. Locurli nai cama crehti suntu bazinlu inferior a Siretlui (estul ali Romanie) zona a Banatlui (sud-vestu) şi confluenţa anamisa di araulu Prut şi Duna (tru sud-estu).
Amanipsearea: Tascu Lala
