Niachicâseri tu suţata di la puteari tu Românii
România Internațional, 21.02.2014, 11:40
Ofiţial, liderl’ii liberali şi soţial-democrat a suţatâl’ei cari easti la guvernari aşteaptâ dzua di Luni ta s-veadâ maca ari vârâ cali di-mpâcari dupu încâcerli publiţi mutrinda structura a executivlui. Di oarâ, aestu easti chirolu ţi-l caftâ şeflu liberal, Crin Antonescu, a premierlui PSD Victor Ponta ta s-tin’iseascâ alâxerli câftati di PNL, iara aţea di nai ma marea simasii, furn’iea ti cari furâ şi ahânti niachicâseri easti apruchiarea al Klaus Johannis ca ministru di Interni şi ca viţepremier. Zboarâli di Gioi a doilor lideri adrarâ cama mari falia dit USL şi aspun nica unâ oarâ sţenariul di dispârţari.
Victor Ponta alâvdă intransigenţa cu cari PNL poati s-acaţâ di câftărli a lor, ama faptul că nu vru s-zburascâ mutrinda criza guvernamentalâ aspusâ di PSD aratâ că Antonescu aleapsi s-partiţipâ la prezidenţialili dit toamnâ nu di partea al USL, ama dit opoziţii. Victor Ponta: Pistipsescu că Antonescu tora luă apofasea ta s-ducâ singur la prezidenţiali, s-hibâ un candidat dit opoziţii, câ ţe – pânâ tora – candidaţl’ii di la prezidenţiali cari partiţiparâ dit opoziţii amintarâ”. Ahtări zboarâ aratâ multu limpid, spusi Crin Antonescu, intenţia a protlui-ministru ta s-ascoatâ PNL dit Guvernu şi ta s-alasâ nanâparti magioritatea soţial-liberală. Tuti aesti, ta s-adarâ un executiv anamisa di naua Uniuni Soţial-Democratâ, dit cari adarâ parti PSD şi nica dauâ partidi n’iţ, PC şi UNPR.
Ama ti aestu lucru, lipseaşti unâ nauâ legitimitati, ti cari maşi un vot tu Parlamentu poati sâ-i da cali, dzâţi prezidentul PNL: Domnlu Ponta ari putearea, guvernarea, ipotisea di prot-ministru – di la cetăţen’i, ama deadun cu noi, di la Parlamentul ali Românii, tut deadun cu noi. Aşi, ta s-hibâ nica la puteari, fărâ Partidlu Naţional Liberal, lipseaşti s-aflâ unâ nauâ cali ti aestâ puteari, icâ unâ nauâ cali ti legitimitati”. Şeflu liberal pricunuştea că ari pţâni şansi ca dzua di Luni s-andreagâ criza di turlii politicâ. Di pi mardzini, presa ahurhi s-minduiascâ tu ţi mutreaşti yinitoarea magioritati USD. Matematic, aesti easti la Senat, ama la Camera a Deputaţlor, USD lipseaşti s-aibâ şi andruparea a UDMR şi a minorităţlor, ta s-poatâ s-ascoatâ caplu. Maca ti apruchiarea a unui nău guvern, Victor Ponta poati s-adunâ voturi tu legislativ, pi di altâ parti mărli proiecti soţial-liberali mutrinda alâxearea ali Constituţii şi andridzearea administrativ-teritorialâ pari că s-aparsirâ di oarâ, câ ţe ti promovarea a lor lipsescu voturili a dauâ triimi dit alepţâ. Tu tiurii, un guvernu USD ari cali, ama tu practico putearea a lui, tu ţi mutreaşti acţiun’ili, easti limitatâ.
