Niachicâseri mutrinda bugetlu di stat
Andamusea di Marţâ dintrâ prezidentul Traian Băsescu şi premierlu Victor Ponta, cu furn’ia taa s-aflâ unâ bunâ andridzeari tu ţi mutreaşti pâhălu a accizâl’ei la combustibil, armasi fârâ niţi vârâ rezultat. Doil’ii armasirâ alargu un di alantu mutrinda aestâ problemâ şi nu s-achicâsirâ — caplu ali vâsâlii dzâţi că pâradzl’ii adunaţ la buget prit criştearea cu 7 eurocenţi a accizâl’ei la combustibil poati s-hibâ ufilisiţ cu scupo di turlii electoralâ, iara premierlu aduţi aminti că aestâ meatrâ fu apruchiatâ deadun cu instituţiili creditoari internaţionali. Ufilisindalui multu proţedurli constituţionali, Traian Băsescu hâbârisi că va s-pitreacâ a Parlamentului Nomlu a Bugetlui ti anlu yinitor ta s-hibâ mutrit nica unâ oarâ, ama cu pripuneri limpidz tu ţi mutreaşti di iu s-hibâ n’icşurati alocărili, ta s-armânâ la idyul nivel defiţitlu apruchiat şi di instituţiili finanţiari, fârâ s-mai creascâ acciza la combustibil.
România Internațional, 04.12.2013, 11:59
Tu minduia a prezidentului, la Ministerlu a Împrustarâl’ei Regionalâ ari unâ repartizari bugetarâ multu pisti nivel, idyea ca tu capitolu Servicilu a borgil’ei”: Io n’iu am borgea moralâ, ca prezidentu, cari veadi pi pâltărli a a român’ilor s-adunâ tu bugetlu di stat pâradz ti clientela politicâ. Ama va s-pot s-am tu mânâ maşi acţiun’ili tu turlii legalâ, icâ s-pitrec bugetlu nâpoi la Parlamentu şi dapoaia maca s-avem catandisi paranom, sâ’l pitrec şi la Curtea Constituţionalâ. Ahât maşi. Io nu pot s-îi a Guvernului, prit alti câl’iuri, zorlea s-u alasâ ordonanţa di urgenţâ prit cari alâxi Codlu Fiscal; dupu pitriţearea nâpoi tu Parlamentu a bugetlui, maca el va s-hibâ apruchiat ca pânâ tora, tu idyea formâ, am borgea s-lu aprochiu ş-mini.”
Premierlu Victor Ponta dzâsi că el veadi purtata a prezidentului ca hiindaei ici flexibilâ: Prezidentul va s-pitreacâ iara nomlu, va u contestâ la Curtea Constituţionalâ. Nâdia mea şi ţi caftu io easti ca aesti proţeduri – ti cari şi dumnia-a lui pricânâscu câ nu ufilisi canâoarâ niţi un prezidentu tu 23 di an’i — s-hibâ bitisiti cât ma ayoniea, ta s-putem ca pânâ la 1 di Yinaru s-avem buget. Nu-n’i deadi asiguripseri niţi că da, niţi că nu.” Tu minduita a analistului icunumic Aurelian Dochia, dauli metodi, aţea pripusâ di Guvernu, ama şi aţea a prezidentului, mutrinda n’icşurarea a hărgilor şi dânâsearea a criştearâl’ei di taxi, sunt di apruchiat. Pânâ tu soni, dzâţi Dochia, easti zborlu di unâ alidzeari di turlii politicâ, câ ţe totna avem ş-alti optiun’i la construcţia bugetarâ. Tora, di oarâ, niachicâserli s-vidzurâ tu criştearea a cursului valutar.
