NATO şi securitatea europeană
Roxana Vasile, 04.04.2016, 17:56
Aoa si 12 di an’i, pi 29 di martu, România adera la NATO prit dipunearea a instrumentilor di ratificari la Departamentul di Stat a SUA, depozitarlu a tratatlui a Alianţal’ei Nord-Atlantica. Dupu aestu momentu, la 2 di apriliu 2004, s-feati teremonia ti alinarea a hlambural’ei româneasca la sediul NATO. Ahurhindalui cu 2005, tru România easti marcată Dzuua NATO tru prota dumanică a meslui apriliu, aesta hiindalui una sărbătoari publică ahardzita ti democraţie, spiritlu european şi euroatlantic. Anlu aestu, una teremonie militară s-tnu la sediul a Ministerlui ali Apărari, cari ş-discl’isi porţali ti publiclu di iutido.
Fu prezentat, ntra altili, un exerciţiu di nvitari a armamentului executat di militarl’ii a Brigadal’ei 30 Gardă Mihai Viteazu, fu organizată una expoziţie di tehnică militară şi putura s-hiba mutriti filmi cu tematică militară. Una teremonie militară dedicată ti Dzuua NATO s-tanu şi la Baza aeriană Kandahar dit Afganistan, la cari loara parti militari dit Batalionlu di Infanterie Protecţia Forţal’ei “Călugăreni” ica dit pareia di consiliere a forţilor di securitate afgani. Anaparti di manifestărli populare, Dzuua NATO fu şi una naua furn’ie tra oficial’ii di Bucureşti să spuna diznau că România easti un aliat apreciat, cari l’ia parti activ la anvartusearea ali Alianţa. Ministurlu ali Apărari, Mihnea Motoc, adusi aminti că tru atel’i 12 di an’i cari tricura di la aderarea la NATO, România spusi axizearea ca easti di mari pistipseari:
“România easti salami identificată ca un sot vartos. Sa ştie tru NATO că România easti un aliat cari ş-tin’iseasti totna zborlu ti s-lu da. Contribuim cabaia la tuti operaţiunile, misiunile dizvartiti di NATO tru teatri, contribuim cabaia la alaxearea di informaţii dit Alianţă şi aesta, dit oara ali aderari, a deapoa aza escu pirifan, ca român, că cetăţen’il’i a noştri suntu ma largu atel’i ti andrupascu aisti organizaţii internaţionale cari suntu di thimel’iu tra lumea dit cari fatem parti, a curi valori li îmbărtitam.”
Tru contextul a unal’ei catastisi di securitate acutotalui alaxiti tru Europa a an’ilor dit soni, România ş-lu ţani angajamentul tra s-agiuta ti anvartusearea a areaptal’ei dit apirita ali Alianţa Nord Atlantica-asi cum spusira em prezidentul Klaus Iohannis, em premierlu Dacian Cioloş. Tru chirolu anda şeflu a statlui scoasi tu videala că aderarea ali Românie la NATO, aoa si 12 di an’i, easti un dit succesile remarcabili a political’ei externi româneşti contemporani, premierlu cundil’e că Guvernul ş-lu tani angajamentul tra s-creasca capacitatea operaţională ali Armata şi tra s-ahardzeasca a aistui sector fondurli ti suntu ananghi tra una bună armatuseari şi tra crişteari calitatea a banal’ei tru arada a ascirladzlor.
S-adutem aminti că, anlu ti tricu, Bucureşti fura discl’isi Comandamentul ali Divizie Multinaţionala di Sud-Est – structură aliată di cumandu şi control, cata cum şi Unitatea di Integrari a Forţilor NATO. Tutunaoara, easti tu lucru finalizarea a scutlui american antirachetă di Deveselu, dit sudlu ali Românie, transferlu a alustui cătra NATO hiindalui tru arada bagata prit plan.
Armanipsearea: Tascu Lala
