Moaubeţ mutrinda politiţli di turlii fiscalâ

Meatrili di lişurari fiscalâ dit năulu Cod Fiscal suntu buni, iara impactul a bâgarâl’ei a lor tu practico poati s-hibâ amortizat cu agiutorlu a criştearâl’ei icunumicâ, ama şi cu agiutorlu a adunarâl’ei cama bunâ a taxilor — dzâsi disnău, Luni, premierlu român, Victor Ponta, tu protlu interviu di la turnarea a lui dit vacanţâ.

România Internațional, 11.08.2015, 11:57

Meatrili di lişurari fiscalâ dit năulu Cod Fiscal suntu buni, iara impactul a bâgarâl’ei a lor tu practico poati s-hibâ amortizat cu agiutorlu a criştearâl’ei icunumicâ, ama şi cu agiutorlu a adunarâl’ei cama bunâ a taxilor — dzâsi disnău, Luni, premierlu român, Victor Ponta, tu protlu interviu di la turnarea a lui dit vacanţâ.

Pi di altâ parti, prortlu-ministru spuni că, maca năulu Cod nu va s-hibâ apruchiat tu Parlamentu, lucrâtorl’ii dit sectorlu public nu va s-poatâ s-hârseascâ di un nău nom di salarizari. El dzâţi că niachicâsearea di tora pi Codlu Fiscal easti 100% di turlii politicâ. Victor Ponta: Tutâ lumea apruchie Codlu Fiscal pânâ tu dzua cându prezidentul Klaus Iohannis lu pitricu tu Parlamentu ti nica unâ mutreari. Di atumţea, s-câftarâ furn’ii, argumenti. Protlu argumentu, că nu ari pâradz. Mea că ari! Doilu, că va s-yinâ altâ crizâ tu lumi. Nu dzâţi canâ că nu yin catandisi greali, ama nu minduiescu că yini criza mondialâ, maca avem noi TVA-lu 19 icâ 24. Treilu lucru: di la 1 di Yinaru, crescu tuti amintatiţli a bugetarilor şi va s-hibâ un lucru laiu. Nomlu mutreaşti un chiro di an’i di dzâli di tranziţii. Cara dzâţi cariva că di la 1 di Yinaru pot s-creascâ amintatiţli la bugetari easti unâ arâdeari. Pot s-creascâ niham câti niham, tu ma lungu chiro, tu aţea ţi alasâ spaţilu bugetar tu cathi nom a bugetlui.”

Ponta apândisi, aşi, a giudicăţlor şi a avertismentilor ligati di sustenabilitatea a meatrilor di lişurari fiscalâ viniti di partea a caplui ali vâsâlii, a guvernatorlui a Bancâl’ei Naţionaâ, ama şi a nâscântor reprezentanţâ ai creditorilor internaţionali ali Românii (FMI şi Comisia Europeanâ). Aeşţâ dit soni dzâsirâ că bâgarea tu practico tu idyul chiro a ahtări meatri poati s-ducâ la mări problemi macroicunumiţi.

Nai ma mulţâl’ii dzâsirâ a autorităţlor di Bucureşti că easti cama ghini s-dânâseascâ ayunisearea a lor şi s-alâxeascâ planurili di hărgi.

Năulu Cod Fiscal pitricut pi 17 di Alunar di prezidentul Klaus Iohannis tu Parlamentu, va s-hibâ disnău mutrit, t-unâ sesiuni ayoriea, extraordinarâ, tu inşita a meslui.

Nâintea aliştei sesiuni, partidili parlamentari apruchiarâ, dupu moaubeţ apreasi, s-zburascâ pi tema mutrinda Codlu. Coprezidentul PNL, protlu partid di opoziţii, Alina Gorghiu, dzâsi că aestu lucru hârseaşti politica româneascâ, icâ apruchiarea a moaubeţlor di câtrâ partidili dit opoziţii şi di la guvernari tu ţi mutreaşti un proiectu di mari simasii, pi cari tuţ – clasâ politică, soţietati şi mediu di emburlâki – lu vor s-amintâ. Ea dzâsi că liberalii va ş-aspunâ votlu ti un Cod Fiscal t-unâ turlii cari s-andrupascâ meatrili di lişurari fiscalâ.