Isapi şi angajamenti ali ascheri româna
2016 fu un an di tranziţie tra Ascherea ali Românie, em dit videala a apofasilor ti s-loara si eara bagati tru lucru di NATO, la andamusili dit Ţara Galilor şi dit Polonia, ama şi dit perspectiva a bugetlui, cari agiumsi, estan, la 2% dit PIB. Ministerlu ali Apărării Naţionale ş-parastisi, marţa, isapea ti anlu ti tricu, evenimentu la cari loara parti şi şeflu a statlui român, Klaus Iohannis, premierlu Sorin Grindianu, şi prezidentul di la Camera a Deputaţlor, Liviu Dragnea. Tru opinia a ministrului ali Apărari, Gabriel Leş, România easti ndreaptă s-tana cheptu la provocărli di securitate, nica si a fuvirserlor di la sinutlu dit apirita a atacurlor cibernetiti. El declara că Armata română lipseasti s-ţană un nivel analtu di reacţie tra apărarea naţională.
Mihai Pelin, 01.03.2017, 13:21
Tru arada a lui, Klaus Iohannis spusi că Parteneriatlu Strategic cu Statili Unite şi anvartusearea a statutlui tru cadrul a Alianţal’ei Nord-Atantiti armân priorităţ ali Armata. A militarlorl români la si cadi pan di mardzină s-hiba apreciaţ, cundil’e şeflu a statlui. Klaus Iohannis: “Askerea easti una instituţie di thimel’iu a statlui român, pi cari cetăţean’il’i a vasiliil’ei a noastra u mutrescu cu pistipseari şi cu pirifan’e. Aestu nivel di tin’iseari s-fati di furn’ia a profesionalismului a militarlor şi a tivililor cari ş-baga tru lucru misiunile cu patriotismu şi devotamentu.”
Prezidentul scoasi tru migdani importanţa ti u ari Askerea tru un contextu internaţional complexu, cu evoluţii geopolititi, ama şi di securitate cari alu mintira mediul internaţional tru an’il’I dit soni: prilundzearea a conflictului dit apirita ali Ucraina, polimlu dit Siria, terorismul fundamentalistu islamic şi criza a migranţalor, ti isi tru migdani di itia a instabilitatil’ei dit Orientul di Mesi. Nica si premierlu Sorin Grindianu cafta ca programili di ndridzeari cu halat să u minteasca industria naţională di apărari, tru condiţiile tru cari executivlu easti apufusitu s-li ţană alocărli bugetare tra armată la nivelu a angajamentilor.
Ia ti spusi Sorin Grindianu: “Bugetlu ali apărari pruveadi, simfun cu angajamentulu ti na-lu lom, ahardzearea a 2% dit Produslu Internu Brut. S-ari tru videala ţanearea a nivelui di alocari, tru perioada 2018 – 2020. Aestu buget asiguripseasti un loc vartos tra accelerarea mutrindalui modernizarea ali Armata Româna.” Tutunaoara, premierlu napoi spusi angajamentul “susta” a Executivlui ti alu cumanduseasti tra bagarea tru lucru a scupadzlor politit di apărari şi tra hairea a modernizaril’ei si a anvartusearil’ei ali Armata. Militarl’i români suntu un exemplu di fermitati, promptitudini şi profesionalismu, spusi şi prezidentul di la Camera a Deputaţlor, Liviu Dragnea. Liderlu PSD nica spusi că ateali dauă procente alocate ahurhindalui cu 2017 tra apărari reprezintă minimum ti lipseasti s-hiba tin’isitu tru yinitorl’I 10 an’i di cătra România.
Autor: Mihai Pelin
Armanipsearea: Tascu Lala
