Isăchi după Brexit

Ufitial, numirlu a lucrătorlor români dit Marea Britanie easti di aproapea 200 di n’il’i. Ti zn’ie va s-aibă aeştă di furn’ia ali apofasi ti u loară britanitl’i tra s-iasă dit Uniunea Europeană şi cum fu aprucheat Bucureşti rezultatlu a referendumlui, tru arădărichili di ma nghios va vă spunem.

Corina Cristea, 27.06.2016, 13:46

Rezultatlu a referendumlui dit Marea Britanie bagă Uniunea Europeană dinintea a unei situaţii fără pretedentu, pi cari apufusitorl’i di Bruxelles, ama şi cafi un lider european lipseasti s-nveaţă să u chivernisească. Bucureşti, ti scurtu chiro după ti nvitara ti apofasea ti u loară britanitl’i, prezidentul Klaus Iohannis la gri a guvernatorlui a BNR, Mugur Isărescu, a premierlui Dacian Cioloş şi a liderlor di partidi.

A deapoa concluzia a discuţiilor fu dimăndată, ma amănat, di caplu a statlui-România va s-chivernisească fără problemi majore impactul mutrindalui ieşearea ali Mari Britanii dit Uniunea Europeană. Prezidentul spusi că lo asiguripseri di partea a guvernatorlui că BNR s-ndreapsi tra Brexit şi, ticara că cursul a leului avu zn’ie dupu referendum, chirearea easti moderată comparativ cu situaţia a alăntor valuti central şi est-europeani.

Protesul di ieşeari ali Mari Britanie dit Uniunea Europeană va s-hibă un protes lungu, va să s-tănă păzărapseri tru aestă noimă, la cari România va s-l’ia parti şi va s-aibă ngătan di sinferurli isisi, nica spusi, di altă parte, Klaus Iohannis:

România va s-păzărăpsească atea turlie câ intereslu a l’ei s-hibă avigl’eat. Şi, multu importantu, România va s- păzărăpsească atea turlie tra s-avem ngatan ti român’il’i a noştri cari băneadză şi lucreadză tru Marea Britanie.

Easti importantu sa stim că Marea Britanie, după ieşearea dit Uniunea Europeană, va s-armănă un partener multu importantu tră România. Nu va s-aibă ama statut privilegiat tru ligătura cu Uniunea Europeană.” Tră România easti importantu s-l’ea parti activ tru chirolu ti yini la moeabetli di năuntrul ali Uniuni, ama şi s-l’ia apofasili corecte tră evoluţia a l’ei, spuni şi premierlu Dacian Cioloş:

România s-hărseasti di ună situaţie economică bună tru aestă oară şi easti multu importantu că prit apofasili ti li lom, prit purtaticlu ti va lu avem tru chirolu ti yini şi la nivelu a guvernului, ama şi la nivelu a clasăl’ei politica s-adrăm ma largu dit aestă situaţie economică un atu tra s-crească rolu şi impactul pi cari România poati s-lu aibă ca stat membru tru Uniunea Europeană tru discuţiile cari va s-yină ma nclo.

Şi, dit aestă videală, vă călisescu s-avet ngătan ti apofasili polititi cari va s-hibă loati tru aestu an electoral, maxus apofasi polititi cari pot s-aibă un impactu ti buget şi ti economie.” Tuţ factorl’ii politit di Bucureşti lugursescu că România lipseasti s-armănă pi calea europeană, tra atea că Uniunea Europeană easti un proiectu valoros cari lipseasti s-hibă dus ma largu.

Textul: Corina Cristea

Armanipsearea: Tascu Lala