Reacţii ditu România la moartea a Văsiloañillei Elisabeta a II-a
Mulţă lideri româñi pitricură mesaje di puryurii la moartea Văsiloañillei Elisabeta a II-a.
Eugen Cojocariu, 08.09.2022, 21:37
Mulţă lideri româñi pitricură mesaje di puryurii la moartea Văsiloañillei Elisabeta a II-a.
Puryurii ditu inimă ti moartea Majestatillei a Llei Văsiloañea Elisabeta a II-a, pitricu prezidentulu ali Românie, Klaus Iohannis. Dumnillea a Majestatillei a Llei, cari s’tindi pi 7 dekenii, thimilliusi istoria modernă și easti un semnu anămusitu ti loialitatea și angajamentului andicra di serviciul public. Româñilli suntu deadunu cu populu britanic și Fumeallea Văsilikească, adăvgă caplu a statului.
Cu ahădosu virinu, pitrecu cu tut suflitlu puryurii pănu di Fumeallea Văsilikească, ti bănătorlli ditu Regatlu Britanic și Commonwealth, ngrăpsi Marcel Ciolacu, prezidentulu a Camerăllei Deputaţlor şi prezidentulu a PSD. Majestatea a Llei Elisabeta a II-a thimilliusi apunţă anamisa di națiuni și oamiñi cari va s’acaţă la bărnurli yinitoari, adăvgă liderul social-democrat.
Prezidentulu USR, Cătălin Drulă, pitreaţi un mesaj di puryurii di itia a moartillei a Văsiloañillei Elisabeta a II-a, cundillinda că Năsă va s’armănă tru aduţearea aminti tru lumea tută ca semnu a nămuzillei şi a stabilitatillei.
Fumeallea Văsilikească ali României şi spusi gioi marea dureari ti hăbarea lae mutrinda traţirea la Aţelu di Analtu a Majestatillei a Llei Văsiloañea Elisabeta a II-a ali Mari Britanie.
Autoru: Eugen Cojocariu
Armânipsearea: Taşcu Lala
