HÂBĂRLI ti CÂRUNA-19: apofasi ti ambudyiuseari arâspândearea Sars-CoV-2
Ministurlu ti Sănătati, Nelu Tătaru, și secretarlu di statu Raed Arafat dimândarâ, marțâ dicseară, năili restricții după andamusea di lucru a Comitetlui Național ti Catandisi di Ananghi.
Lica Manolache, 14.10.2020, 08:06
Ași, ti evenimentili privati, cata cum numțâli, pâtigiuńili, yiurtuserli, measili festivi, nu s’da cali ta s’țânâ tu locurli ncllisi și dișcllisi tu planu național.
Prusupida, orlea-zorlea lipseaști purtari tu locurli iu ari câlbâlâki tru localitățli iu incidența easti sumu 3 tru ńilli.
Ma s’hibâ di incidența-a cazurlor easti ma mari di 3 la ńille, orlea-zorlea va purtari prusupida tru tuti locurli dișcllisi.
Tutunâoarâ, activitatea a sălliurlor di spectacoli, teatri, ținematografi, restauranti, cafineadz s’ńicureadzâ pânu di 50% aclo iu rata di infectari easti sumu icâ isa-isa cu 1,5 la ńillia di bânâtori și pânu di 30% iu incidența easti anamisa di 1,5 și 3 la ńille.
Tutunâoarâ, Comitetlu Naţional ti Catandisi di Ananghi, lo apofasi ta s’pripunâ prilundzearea-a catandisillei di alertă cu ninga 30 di dzâli, ahurhindalui cu dzuua di 15 a meslui sumedru.
Nica și prezidentul Klaus Iohannis țânu unâ conferință di presă aseara tru cari feați timbihi ti numirlu mari di morțâ la cari s’agiumsi di itia-a pandemiillei: “Videmu unâ crișteari gâilipsitoari pi tuț indicatorlli. Nâ ampulisimu cu unâ arâspândeari cabaia mari. Dipu mulțâ româńi keru alumta cu aestu virusu/ lângoari. Agiumsimu pi unâ halâ multu greauâ, tru unâ ahtari, numâsita dalgâ, a daua și easti ananghi, orlea-zorlea s’așțâmu aestu imnaticu. Ma s’nu avemu unâ gaereti a tutâloru oamińiloru nu’ari ta s’aprâftâsimu, s’nâstrițemu aestâ criză ți nu s’ari vidzutâ pânâ tora.”
Autoru: Lică Manolache
Armânipsearea: Tașcu Lala
