Hăbări ditu bana românească şi internaţională
COVID-19. Simfunu cu aţeali ditu soni ţifri publicate di autorităț dumănică, 7595 di năi infecții cu Covid-19 fură dimăndati tru 24 săhăţ ditu soni tru România, cu 60% ma multu andicra di aoa şi ună stămănă. Eara raportate 28 di decese ligate di Covid. Experțălli lugursescu că ţinţea dalgă a pandemiillei easti ma vărtoasă andicra di atea di ma ninti și s’lugurseaşti s’agiungă pi kipită tru România tru aţea ditu soni stămănă ditu yinaru ică prota ditu meslu şcurtu, cându s’lugurseaşti că numirlu a cazurlor ndzuuă va s’agiungă la 50 di nilli. Sinferlu a româñilor ta s’amintă jab easti nica scădzut, cu maş 36 di suti tru 24 di săhăţ ditu soni. Epidimiologilli căndăsescu oamiñilli să s’imunizeadză, căţe categoriile vulnearabile suntu tru piriclliu.
Newsroom, 16.01.2022, 18:48
TENIS. România ari ţinţi reprezentanță pi tabloulu prinţipal di tu Australian Open, primlu turneu di Grand Slam di estan. Alță români fură eliminaț ditu competiție. Tru primlu tur, Simona Halep, fostul numir ună mondial, va s’antreacă cu Magdalena Frech ditu Polonia, kiro tu cari Sorana Cîrstea va s’agioacă cu Petra Kvitova ditu Cehia, cari ari un avantaj di 5-3 tru meciurile cap la cap. Ună altă agiucătoari română, Irina Begu, va s’alumtă cu franțuzoiaca Oceane Dodenu. Jaqueline Cristian ditu România va s’agioacă cu Greet Minnen ditu Belgia, iara Gabriela Ruse va s’agioacă cu Jasmine Paolini ditu Italia. Agiucătoarea britanică Emma Răducanu, cari ari un tată român și easti campioana-apărătoari la US Open, va s’agioacă cu Sloane Stephens ditu SUA.
HANDBAL. CSM București, ună parei handbal feminin ditu România, ș-asiguripsi sâmbătă seara ună victorie tru deplasari cu 28-20 contra echipăllei muntenegrene Buducnost BEMAX Podgorica tru Grupa A a Ligăllei Campionilor. Românii featiră unu bunu spectacol și amintară ună victorie ţi lă si cădea. Tu 19 di yinaru, handbalistilli a noștri va s’ampulisească cu echipa franceză Brest Bretagne și trei dzăli ma amănatu cu Borussia Dortmund ditu Germania. Antrenați di selecționerul naționalei României, Adrian Vasile, CSM București ari ca protu scupo s’amintă tuti aţeali trei meciuri ditu aestu mesu.
JUSTIȚIA. Ministerlu ali Justiție di București bitisi un proiectu ti ncllideari Direcția Speciale di cercetari a infracțiunilor ditu justiție, SIIJ. Instituția dimăndă tru un comunicat că tru dzălili ţi yin va s’pitreacă documentul ti aprobari a Guvernului și Parlamentului. Năpoi aduţemu aminti că activitatea aluştui organismu special adusi critiţ di partea a Comisiillei Europene, cari spune că SIIJ poati s’hibă cama susceptibil la intervenții di nafoară andicra di Direcția Anticorupție, cunuscută tru România ti DNA. Ministerlu ali Justiție dimăndă că va s’ahurhească proceslu di alăxeari a nomurloru ti justiție și a codurlor penale aţea turlie că aestea s’poată s’hibă aprobate di Parlament până tu bitisita a meslui marţu. Ministerlu ali Justiție năpoi aduţi aminti ti ndreptul și legislația ali UE stipulate ca ndrupămintulu andicra di Tratatlu di Lisabona și pricunuscute di constituția ali Românie.
Autoru: Udălu a hăbărlor
Armânipsearia: Taşcu Lala
