Prima pagină » Actualitate » Hăbărli » Hăbări ditu bana românească şi internaţională

Hăbări ditu bana românească şi internaţională

Covid-19 Ro – București, Comitetlu Național tră Situații di Urgență apufusi că cetățeñilli români ică cetățenii ditu UE și Elveția, cari yinu ditu văsiliili sud-africane, iu alănci naua, nica ma contagioasă lumaki a năului coronavirus, va s’hibă tru carantină , acă suntu ică nu suntu vaccinaț. Elli pot s’hibă silighiţ ditu carantină după 10 dzăli cara rezultatlu a testului Covid easti negativ. Autoritățli actualizară, tutunăoară, lista a văsiliiloru/teritoriilor cu risc epidimiologic mari, cari acaţă tu isapi tora și Botswana, Eswatini, Lesotho, Mozambic, Namibia, Africa di Sud și Zimbabwe. Intrarea pi teritoriul ali Românie a xeñloru extracomunitari ţi agiungu ditu statili adusi aminti fu curmată. Di altă parte, 1.727 di cazuri năi di COVID-19 fură raportate tru 24 săhăţ ditu soni tru România și 180 di decese, ditu cari 19 fură nregistrate ninntie di perioada di referință. Maş patru giudeți sunt nica tru scenariul aroșu. Rata di incidituță a COVID-19 faptă isapi ti unu kiro di 14 di dzăli tră București scădzu la 2,26 cazuri la ñillea di bănători. Tru aţea ţi mutreaşti campania di vaccinare, ditu ahurhita a aliştei, tru andreu, aproapea 7,35 miliuñi di oamiñi fură vaccinaţ integral.

Newsroom, 27.11.2021, 06:47

Lumea COVID — Organizația Mondială a Sănătatillei spusi ti naua variantă di coronavirus ditu Africa, număsită Omicron, că easti ună variantă di găilipseari”. Varianta ari un numiru mari di mutații/alăxeri poati nia s’hibă cama contagioasă andicra di varianta Delta. Tut ma multi stati apufusiră tra ş’ncllidă sinurli tră oamiñilli ditu Africa di Sud. Restricțiile fură dimăndati di SUA, Canada, Turcia, cum și di născănti state membre ale UE. Prezidentulu CE, Ursula von der Leyen, spusi că tuti statili membre, pritu coordonari, ti bunu va s’hibă tra s’ufilisească ași-num$sitlu Mecanismu di sigurlăki tra s’curmă azboiurli cătră văsiliili ditu Africa di Sud. Naua variantă fu detectată tru Europa.

Plan di reziliență — Acordul di împărmut pritu Mecanismul di Recuperari și Reziliență anamisa di Comisia Europeană și România tră silighearea a unei protă tranșe, tru valoari di aproapea 15 di miliardi di euro, fu parafat viniri di năulu ministru di Finanțe, Adrian Câciu, dimăndă Ministerlu a Finanților, sâmbătă. Împrumutlu va s’hibă ufilisitu tră finanțarea a deficitlui a bugetlui di stat și tră refinanțarea a borgillei publiţi guvernamentale, pi thimellilu a hărgiloru bugetar fapti tră reformele pruvidzute tru Planlu Național di Recupearare și Reziliență (PNRR). Păradzlli va s’hibă daţ tru dzaţi tranșe, pi thimellilu a tiñisearillei di cătră partea română a țintilor pruvidzuti tru reformili și investițiile asociate împărmutului. Tutunăoară, Comisia Europeană va s’bagă la dispoziție ună prefinanțare di 13% ditu împărmut (circa 1,94 miliardi di euro), după intrarea tru lucru a Acordului. Tru cadrul a PNRR România s’hărseaşti di aproapea 29 di miliardi di euro, aproapea giumitati ditu păradz hiinda un grantu, alanţă syntu parti ditu un împrumut.

Tenis — Echipa a Româniillei conduţi cu 2-0 echipa statlui Peru tru playoff-ul di calificari tră faza finală a Cupăllei Davis după ţi tenismenlu Marius Copil l-azvimsi sâmbătă la Cluj (nord-vest) pi Conner Huertas dil Pino cu 7-5, 6-2. , tru doilu meci di simplu al competițiillei. Tru primlu meci di simplu, Nicolae Frunză l-u azvimsi Nicolas Alvarez, tru 2 seturi, scor 6-2, 6-4. Meciul di dublu anamisa di Marius Copil / Horia Tecău și Sergio Galdos / Arklon Huertas dil Pino va s’ţănă dumănică. Dumănică va s’ţăñă și meciurli di simplu anamisa di Marius Copil – Nicolas Alvarez și Nicolae Frunză – Conner Huertas dil Pino. România și Peru s’andămusescu tră prima oară tru Cupa Davis.

Autoru: Udălu a hăbărloru

Armânipsearea: Taşcu Lala