Hăbări ditu bana românească şi internaţională
Newsroom, 26.11.2021, 18:40
COVID-19 — Școlliurli ditu România ahurhiră s’aibă testi rapidi neinvazivi tră COVID. Protlu lot di 6,5 miliuñi di testi fu ampărţătu gioi, declară ministurlu ali Educație, Sorin Cîmpeanu, adăvgânda că testarea va s’facă tru școlliuri aclo iu profesorllii și vrearea și infrastructura va s’da cali. Cara sculiili nu voru s’facă testarea, cilimeañilli va s’hibă testaț acasă, sumu avigllearea a părințăloru, a tutorlor legali ică a unlui adultu. Stămâna yinitoari va s’ahurhească testarea rapidă a cilimeañiloru preșcolari și școlari. Testarea va s’facă di dauă tru stămână, luni și gioi, tru cazlu a cilimeañiloru cari frecventeadză cursurli fizic. Viniri fură raportati 1.958 di cazuri năi di infecție cu COVID-19, pi ningă 160 di decesi asociate, ditu cari 45 ninti di perioada di referință. 1.314 di paciență suntu tru aestu kiro la terapie intensivă. Institutlu Național di Sănătati Publică dimăndă că 70% ditu persoanili diagnosticati cu COVID-19 tru stămâna ditu soni eara nivaccinate. Di la ahurhita a campaniillei di vaccinare, aproapea 7,7 miliuñi di oamiñi loară naima pţănu ună injecție cu vaccinlu anti-COVID-19.
FALSURI – Procurorlli româñi feaţiră năi arestări tru arada ali anchetă mutrinda certificatili verdză falsificati eliberate di un ţentru di vaccinare di la punctul di triţeari a sinurlui Petea. Ună asistentă medicală și alti dauă persoani fură ncllisi tră 24 di săhăţ. Ti aești ari şubei că licşurară ligătura anamisa di persoani cari vrea certificati verdză și elli ișiși falsificatori, cari fură inculpaț stămâna ţi tricu. Suspecțălli lucrară ca intermediari di aflară oamiñi cari vrea ta s’aibă certificati di vaccinare fără s’hibă anănghisiţ s’llia vaccinlu propriu-dzăsu, căfta şhi loa păradz di până la 300 di evradz. Păradzlli fură ammpărțăț deapoa anamisa di lucrătorlli a ţentrului di vaccinari. Tru kirolu yismăciuni-brumaru, Tentrul ari vaccinată oficial 5.500 di persoane, ditu cari 3.500 suntu suspectati că păltiră certificati falsificati.
GUVERNUL – Năulu guvernu PNL-PSD-UDMR cumăndusitu di libearalu Nicolae Ciucă s’andămuseaşti adză tru ună nauă ședință. Tu arada di lucru easti ună ajustare bugetară cari caftă implementarea ntrăoară tra s’asiguripsească păltearea tu oara ananghi a tiñiiloru di cafi mesu și a pensiilor ti meslu ţi yini. Păradz suplimentari va s’hibă păltiţ la ministerili a Finanțiloru, Sănătatillei și Lucărlui, kiro tru cari a ministeriloru ali Agricultură și Transporturloru va lă ñicureadză bugetili. Uidisitu cu datili oficiali, dificitlu bugetar va s’crească cu aproapea 1 miliardu di euro, acă ținta armâni niheamă pisti 7% ditu PIB. Guvernul adoptă gioi, tru prota a lui andamasi di lucru, un decretu di ananghi mutrinda naua structură guvernamentală, cari acaţă tru isapi dauă ministeri suplimentari andicra di cabinetlu anterior. Sorin Grindeanu di la PSD și Kelemen Hunor di la UDMR va s’debuteadză tru ipotisi, a deapoa premierlu Nicolae Ciucă va li aproaki aşi cumu lugurseaşti că easti arada. Uidisitu cu decretlu di urgență, tuti ipotisili disponibile tru instituțiile publiţi va s’hibă dişcllisi tră concursuri di posturi vacanti.
PREMIU – Anutătorlu român David Popovici amintă Premiul Piotr Nurowski Nai ma bunu tiniru sportiv european di veară” 2021 di la Comitetili Olimpiţi Europeani tru arada a unlui evenimentu a curi nicukiru eara căsăbălu Samorin, Slovacia. Tru ilikia di 17 ani, Popovici amintă malăma la Campionatili Europene di anotu pi cursă şcurtă și alti trei medalii la Campionatili Europeani di tineretu. El surpă dauă recorduri mondiale di giuniori la probili di 100 m și 200 m libiru și s-clasă pi loclu 4 la Agiocurli Olimpiţi di Tokyo 2020 la proba di 100 m libiru. Angrăpsitu la clublu sportiv Dinamo ditu București, Popovici amintă premiul dinintea la alţă patru sportivi, Sky Brown ditu Marea Britanie (skateboarding), Adriana Cerezo Iglesias ditu Spania (taekwondo) și Viktoria Listunova ditu Rusia (gimnastică artistică) și Adriana Vilagos ditu Serbia (atletism). Premiul Piotr Nurowski fu adratu ti memoria al Piotr Nurowski, fostul prezidentu a Comitetului Olimpic Polonez cari muri traghic tru un accidentu di avion tru 2010. Tru 2012, gimnasta română Larisa Iordache fu votată a doua nai ma bună tiniră atletă europeană di veară.
Autoru: Udălu a hăbărloru
Armânipsearea: Taşcu Lala
