Hăbări ditu bana românească şi internaţională
Newsroom, 10.11.2021, 07:11
Di pţănu kiro, oponențăllii politiţ a Partidlui Național Liberal (PNL) și Partidlu Social Dimocrat (PSD) ahurhiră marță muabeţ, București tră formarea a unlui guvernu și a majoritatillei parlamentare. La muabeţ loară parti și reprezentanțăll ali Unie Dimocrată a Maghiarilor ditu România (UDMR) și ai minoritățloru naționale, alti andicra di Ungaria, cari va s’facă parti ditu alianță. N’iercuri va s’ţănă muabeţli pe capitolili: economie-finanţare, justiţie, apărare, afaceri externe şi interne, dizvoltare, fonduri europene, transport, agricultură, fise şi energie, a diapoa gioi va să zburască ti lucru, sănătate şi educaţie. Simfunizarea-a programelor guvernamentale easti scupolu a protăllei comată di faze di păzărăpseri. După ndridzearea a unlui program di management comun, va să zburască ti configurația a năului cabinet. Partidlu Social Dimocrat (PSD), amintătoru a alidzerloru parlamentari aoa şi unu anu, ama tru aestu kiro aflat tru opoziție, ari vrearea ca numirlu a ministerilor s’hibă proporțional cu numirlu a diputațlor. Partidlu Național Liberal (PNL) nu va s’tragă mănă di la ipotisea di prim-ministru, pi cari u ari tru aestu kiro, și la dipartamentul di finanți. Dupu apofasea a PNL ta s’ndreagă un nău guvernu cu PSD, Uniunea Salvați România (USR) – parteneru liberal tru guvernu până tru yismăciuni – diclară că va s’ndrupască opoziția, cutugursinda naua coaliție, ti cari spusiră că easti posibilă fostul PNL prezidintulu Ludovik Orban cutugursi şi apofasea a soţloru a lui ti păzărăpseri cu PSD, di adusi aminti că tută campania electorală a PNL fu contra a PSD şi tră guvern ţentru dreapta.
Tru România, catandisea di ndridzeari prilundzeari cu nica 30 di dzăli, iara meatrili și restricțiile actuali armân tru lucru până tru 9 di andreu. Maş persoanili vaccinate și aţeali cari loară lăngoarea tru 6 lli meşi ditu soni au izini s’urdină noaptea, easti ananaghi di prusupidă nafoară, iara tră acceslu tru restaurante, ţentre comerciale și alti activități easti ananghi di un certificat veardi. Numirlu di infecții easti tru scădiare. Aproapea 7.600 di cazuri noi și aproape 500 di decese fură raportate marță. Di altă parte, cama di 6,5 miliuñi di persoane feaţiră până tora schema completă di vaccinare. Uidisitu cu prezidentul a Comitetlui Național di Vaccinare, medic militar Valeriu Georgica, Bucureștiul ari ună anvăleari vaccinală di pisti 63% ditu populația di 12 di ani ş-cama. El nica spusi că ma s’armănă pi rata actuală di vaccinare, până tu inşita-a anlui va s’vaccineadza aproapea 50% ditu românilli a văsiliillei, rată cari, tru minduita al năsu, nu easti duri.
Ministrul român di externi Bogdan Aurescu avu luni consultări cu secretarlu di stat american Anthony Blinken, la Washington. Căbilea ti băgarea ali României tru regimlu fără vize, cari poati s’li curmă vizele tră cetățeñilli români cari călătoresc tru Statele Unite, ama și aspecte a Parteneriatlui Strategic a aţiloru dauă stati fură subiectele prinţipale ale andamasi. Atelli doi oficiali s’akicăsiră că România și Statele Unite s’anvărtuşeadză coopeararea politică, di securitate și apărare. Di altă parte, oficialul român cundille ca una ditu protili lucri di amprotusa ti politică externă ale aistei țări suntu perspectivili aderarillei ali Românie la Organizația tră Coopearare și Dizvoltare Economică (OCDI). El haristusi a omologului a lui american tră agiutorlu ţi ălu da Statele Unite tru avansarea a proţesului.
Autoru: Udălu a hăbărloru
Armânipsearia: Taşcu Lala
