Hăbări ditu bana românească şi internaţională
Newsroom, 25.08.2021, 19:43
Askerea ali României va s’llia parti cu 200 di askirladz ti evacuarea şi relocarea- a cetăţeañilor afgani cari lucrară ti misiunile NATO tru Afganistan.
Consiliul Suprem di Apărari a Văsiliillei apufusi, niercuri, ca Armata României sllia parti cu un efectivu di 200 di militari la evacuarea şi relocarea a cetăţeañiloru afgani cari lucrară ti misiunile NATO tru Afganistan. Militarlli români va s’llia parti la opearaţiuni chiro di nai multu 6 meşi. Operaţia NATO ari tu scupo, tru principiu, priloarea a cetăţeañilor afgani ditu bazele temporare ditu Kuweit şi Qatar şi relocarea aluştoru tru baze temporare di staţionari di pi teritoriul a statilor aliate, cu asiguripsearea a serviciilor esenţiale.
Membrii CSAT agiumsira pi isapea că kivernisearea a consecinţiloru mutrinda catandisea ditu Afganistan, pi şcurtu kiro, di mesis şi lungu, inclusiv sumu aspectul a matimiloru nviţati, va hibă unu di elementele importante a unei ma bună cooperari practică, tru complementaritate, anamisa di NATO şi UE, iara România va s’llia parti la aestă gaereti, să spuni tu unu comunicat oficalu.
Tutunăoară, membrilli a Consiliului cundilleară ananghea a unei coordonari criscută tru atea ţi mutreaşti comunicarea strategică şi combaterea-a dizinformarillei.
Ună petiţie cu cama di 22.000 di semnături, pritu cari s’caftă ca autorităţli s’da vizi tră cetăţeañilli afgani cari colaborară cu România şi NATO, eara pitricută ma ninti la CSAT şi Ministerlu ti Afaceri Externe. Semnatarlli spunu că România lipseaşti s’da vizi ti cetăţeañilli afgani expuşi la prişcăviili a talibanilor: activişti şi activisti ti ndrepturli a omlui, jurnalişti, magistraţ, profesori şi profesoari, studenţă.
Autoru: Udălu a hăbărlor
Armânipsearea: Taşcu Lala
