Hăbări ditu bana românească şi internaţională
Arădz di ngrupari. Arădzli di ngrupari a Văsiloañillei Elisabeta a II-a s’facu adză Londra. Aproximativ 2.000 di persoane eara călisiti s’llia parti la ceremonii, inclusiv 500 di șefi di stat și di guvern și dimnitari xeñi, cum văsilleadzli si văsiloañili ali Belgiei, Olandii și Spaniei, amirălu Naruhito al Japoniei, prezidinţălli a Statelor Unite și Franței, Joe. Bidin și Emmanuel Macron și prezidintulu ali Comisiei Europene, Ursula von dir Leyen. Nica suntu prezenț prezidintulu ali României Klaus Iohannis și Majestatea Sa Margareta, Custodile Coroanei României, și Prințul Consort Radu, cum și Principesa Elena. Tu dzălili ditu soni, ñilli di oamiñi aștiptară arada arada tra s’u pitreacă văsiloanea. Sfindukea a Văsiloanillei easti dus la Westminster Abbey ti ună liturghiseari, cari pruveadi ună gheavasi di partea a premierului britanic Liz Truss. Ditaliile a liturghisearillei, nica şi imnurli, fură aleapti baş di văsiloañea. Sfindukea va s’hibă diapoa dusă tru ună procesiune cătră Wellington Arch, Big Ben va s’asuiră la cathi minută. Niţi unu avion nu va s’azboairă pisupra di Londra. V4siloñea va s’hibă trumurmintată la Castelul Windsor ningă nicukirlu a llei, Prințul Philip.
Newsroom, 19.09.2022, 18:49
Energie. Coaliția di guvernământ ditu România ține astăzi o nouă ședituță tru cadrul a curi poati s’apufusească ţănearea plafonului di 50 di bani per 1 litru di combustibil și după bitisita a meslui. Autoritățli ndregu misuri di economisire a energiillei tru contextul a scădiarilli livrărli di gaze naturale ditu Rusia și a eforturilor di ñicurari a dipendințăllei energhetiţi. Premierlu Nicolae Ciucă spusi că guvernul ari tru vidială un program di ancurajari ti alăxearea a becurilor cu alti ma cu hăiri. Tutunăoară, cathi minister va s’hibă obligat s’părăstisească un plan di misuri tra s’nu s’keară tanalliurea energhia Tru aestu kiro, România agiumsi pi nivelul minim di stocare a gazelor di 80% căftat di Uniunea Europeană. Tru tută Uniunea, aestu nivel easti di 84%. Tru ună altă minari, Institutul Național di Statistică spusi că România ari importată cama di 1,3 milioane di tone echivalent petrol tru proţlli șapti meşi a anlui, reprezentând cu 17% ma puțăn andicra di idyea perioadă a anlui tricut.
Bielorusia. Ministerul român di externe gri a ansărţinatlui cu afaceri interimar al Belarusului la București, dupu comentariili a prezidintului belarus Alexandir Lukașenko, ţi spuni că Statele Unite pingu Europa tru ună ampuliseari militară cu Rusia pe teritoriul ali Ucraina și că alte state, inclusiv România, potu s’agiungă direct implicat. Ministrul român di externe Bogdan Aurescu spusi tru un comunicat că România nu aproaki susta ahtări diclarații inadmisibile cari alimenteadză ună retorică tru relațiile internaționale bazată pe apelu la forță și recursul la forță”. Tru diclarație nica să spuni că România easti membră NATO și s’hărseaşti di tuti garanțiile di securitate cari cură ditu aestu statut.
Concursul Enescu. Atea ditu sonoi finală a Concursului Internațional George Enescu s-bitisi București. Alexandra Segal ditu Israel amintă locul I la concursul di pian; tinirlu Benjamin Kruithof ditu Luxemburg amintă concursul di violoncel; iara românca Maria Marica amintă concursul di avyiulie. Amintătorlli a secțiunillei di compoziție fură coreeanul Shin Kim ti muzică simfonică și italianul Leonardo Marino ti muzică di cameră. Concursul Enescu s-dizvărti anlu aestu sumu motto-ul Muzica nădiillei și nsimnă turnarea tru sălile di concert după ţi evenimentele s-dizvărtiră ică integral, ică parțial online kiro di doi ani.
Autoru: Udălu a hăbărloru
Armânipsearea: Taşcu Lala
