Hăbări ditu bana românească şi internaţională

Văsiloañea. Moartea a Văsiloañillei Elisabeta a II-a, nai ma longeviv monarh ditu istoria Angliei, lu adusi la tron ​​pi hillilu a llei aţelu mari, Charles, cari va s’hibă tru thesea di văsillelu Carol al III-lea. Protocolu tră băgarea tru scamnu a unui nău monarh pruveadi convocarea ntrăoară a unui Consiliu di Adirare adratu ditu politicieni di rangu analtu, episcopi ali Băsearică Anglicană, diadunu cu reprezentanță laiţ a Regatlui. Vasiloañea Elisabeta a II-a muri gii, la ilikia di 96 di ani, la Castelul Balmoral ditu Scoția. Ea va s’hibă dusă Londra, la Westminster Hall, iara publiclu va s’poată s’u pitreacă kiro di ndauă dzăli. Angrupărli va s’facă la Westminster Abbey, băsearica iu suntu băgaţ tru ipotisi văsilleadzlli britaniţ. BBC cundilleadză că atea ditu soni trumurmintare a unui monarh la Westminster Abbey s’feaţi tru secolul al XVIII-lea. După trumurmintare, la cari s’așteaptă s’llia parti șefi di stat și di guvern ditu lumea tută, Vasiloañea va s’hibă dusă la Castelul Windsor și va s’hibă trumurmintată tru Capela Sâmtul Gheorghe ditu incinta aluştui.

Newsroom, 09.09.2022, 20:12

Dificit. Dificitlu a zigăllei comerciale ali Românie tru proţlli șapti meşi a aluştui an criscu cu aproapea 5,9 miliardi di euro, la 18,77 miliardi, exporturli criscură cu 23,9%, iara importurli criscură cu 29%, uidisitu cu datili dimandati di Institutul Național di Statistică, publicate viniri. Tru perioada yinaru-alunaru 2022, exporturile eara di 52,67 miliardi euro, iara importurile 71,44 miliardi euro. Di altă parte, investițiile nete tru economia națională agiumsiră la 57,25 miliardi di lei (piste 11 miliardi euro), tru proţlli șasi meşi a aluştui anu, tru scădiari cu 0,8% andicra di idyea perioada ditu 2021, spunu datele INS.

Consiliul UE. Ministrul ali României tră Energie, Virgil Popescu, fu mandatat s’reprezintă guvernul, adză, la Consiliul Energetic al UE di la Bruxelles. Uidisitu cu purtătorlu di zboru a executivului, ministrul va s’aibă ună abordare unitară la nivel european tra s’asiguripsească furnizarea di gaze și energie electrică la un păhă tră tuț cetățenii ali Uniuni. Ninti diandamasi, Virgil Popescu avu ună andamusi bilaterală cu omologlu a lui vărgaru Hristov Rossen. Aţelli doi zburără ti simasia a cooperarillei regională tră ancupărarea diadunu gaze naturale, cum și tră asigurarea a unei stabilitati energetică criscută tru regiune. România și Bulgaria va s’facă ună forțili tra si s’ndreagă ti di iarnă ditu vidiala a alimentarillei cu energie, ngrăpsi ministrul român pi şingirili socializare. Tru ună altă minari, București, operatorlli energetiţ căftară a Guvernului s’minduească diznău ordonanța apufusită stămâna tricută, cari pruveadi plafonarea și compensarea a facturlor la gaz și energie electrică, cum și supraimpozitarea a companiilor ditu domeniu. Reprezentanții a Asociațiillei Furnizorilor di Energie fac timbihi că documentul fu elaborat fără consultarea a participanților tru domeniu, di bagă tru piriclliu aşi securitatea aprovizionarillei cu gaze și energie electrică a consumatorlor. Elli spun că guvernul alăxeasti regulile tru kirolu anda gioacă și ase da piste cap isăkili tră planlu di afaceri ica pi ateali a consumatorlor casniţ.

Coeziune. Guvernul ali României adoptă ună pachetă di misuri tră operaționalizarea a unlui cirecu ditu fondul di coeziune, tru valoare di 16 miliardi di euro, dimăndă ministrul a Investițiilor și Proiectelor Europene, Marcel Bolos. El exighisi că păradzlli pot s’hibă ufilisiţ tră accesarea și dizvoltarea proiectiloru di investiții tru infrastructura di transport, sănătate, alimentare cu apă și gestionarea a cupriiloru. Tru cadrul a politicăllei di coeziune, România ari un buget di 43 di miliardi di euro până la 31 di andreu 2029, diclară ministrul. Proiectili s’concentreadză prota ti prota pi construirea 600 km di autostradă și 3 spitale reghionale di urgență, Craiova, Iași și Cluj-Napoca.

Agiutoru. Comisia Europeană aprobă ună schemă di agiutor tră România, tru valoare di patru miliardi di euro, tră s’ndrupască emburlăkili ditu tuti sectoarele tru contextul ali invazie tru Ucraina di cătră Rusia — uidisitu cu unu comunicat a executivului comunitar. Uidisitu cu CE, schema di agiutor ali Românie easti ananghi, uidisită și proporțională tră s’ndreagă ună perturbare greauă a economiei unlui stat membru, tru simfunie cu normele UE mutrinda agiutorlu di stat. Tru cadrul alistei misuri, agiutorul va s’hibă ca ună garanțiie tră împrumuturi, cu un buget maxim di 3,6 miliardi di euro, iara artimaia tru granturi directe. Agiutorlu tru cadrul a schemăllei va s’hibă dat până nai ma amănatu la 31 di andreu 2022.

Autoru: Udălu a hăbărloru

Armânipsearea: Taşcu Lala