Hăbări ditu bana românească şi internaţională
UCRAINA Secretarlu general al ONU, Antonio Guterres, căftă luni izini ti inspectorlli internaționali s’intră la centrala nucleară ditu Zaporizhzhia, după ţi Ucraina și Rusia arcară căbatea unualantu mutrinda atea ditu soni bombardari a naima marillei instalații nucleară ditu Europa ţi easti tru ună zonă acătată di askerili aruseşti tru sudul ali Ucraină. Instalația fu bombardată di dauă ori tru dzălili ditu soni, ama nu ditectată niţi ună curari radioactivă. Autoritățli ucrainene nu exclud piriclliulu a unlui fănico nuclear tru regiune și feaţiră un apel tră andridzearea a unei zone dimilitarizate anvărliga ali centrală. Tru arada a llei, Rusia ari nădie că născănti ditu văsiliili occidintale cu ună mare influență ti Ucraina va s’ufilisească aestă influență tra s’nu s’facă ma largu bombardarea a aliştei instalații nucleară di cătră armata ucraineană, diclară Dmitri Peskov, purtătorlu di zboru a Kremlinului.
Newsroom, 08.08.2022, 21:08
COVID 19. Ministrul a Sănătatillei, Alexandru Rafila, diclară luni că numirul total di infecții săptămânale cu Covid-19 fu ñicuratu tru kirolu ditu soni cu ţinţi ñilli tru România. Uidisitu cu oficialu, aestă scădiari easti probabil s’hibă idyea după ună săptămână ică dauă. Autoritățli ditu România dimăndară luni aproximativ 4.700 di năi infecții, majoritatea tru capitala București, tru Hunedoara, tru vest, Cluj tru nord-vest și Brașov tru ţentrul ali Românie. Aproapea 430 di persoane sunt yitripsiti tru spitale, ditu care 274 tru TI. Tru 24 săhăţ ditu soni fură raportate și 14 dicese asociate.
AGRICULTURA Uidisitu cu ministurlu ali Agricultură, Petre Daea, până tru 2027 România lipseaşti s’aibă aproximativ 2,6 milioane di ictări di teren irigabil tră cari va s’hibă ahărdziţ 1,5 miliardi di euro di la bugetlu național. Ministurlu angrăpsi pi un singiru di socializare că implementarea a programlui guvernamental di modirnizare a sistemlui di irigații lipseaşti s’hibă faptă cathi dzuuă, fără dănăseari. Uidisitu cu datili oficiale fapti public, aproapea 243.000 di ictări ditu 30 di giudiţe ditu România avură znie di itia a xerillei tru aestu an.
RATĂ Rata di politică monetară fu majorată di luni cu 0,75%, până la 5,5% tru an. Easte a șasea creaștire a ratei clleaie tru aestu an, instrument pritu care Banca Centrală Română cilăstăseaşti s’ţănă la distanță inflația. Ninti di apofasea dimăndată vineri di Banca Centrală, indicele ROBOR la 3 mesi alină di la 8,11% la 8,12% pe an, agiungânda luni la 8,14% pi an. Experții financiari s’așteaptă ca aestu indice s’crească cabaia, atea ţi va s’crească ratele variabile a dobândzălor la împrumuturi. Ratele a dobândzălor la creditele ipotecare criscură cu piste 50% di la ahurhita a anului și aproapea s’dublară andicra di aoa şi șase ani. Inflația tru alunaru nÂstricu 15% și s’asteaptă s’armănă pi aestu livelu tru al treilea trimestru. Banca Centrală va s’prezenta marță un nou raport trimestrial mutrinda inflația.
Autoru: Udălu a hăbărloru
Armânipsearia: Taşcu Lala
