Hăbări ditu bana românească şi internaţională
Sorin Iordan, 22.06.2021, 20:17
***Ministurlu di Externi, Bogdan Aurescu, âlli căftă a omologlui ucrainean Dmytro Kuleba pricuniştearea ufiţială di cătră administraţia di Kiev a inexistenţăllei aşi-dzăsăllei “limbă moldovenească” şi adusi aminti că, tru meslu apriiur, partea ucraineană ari aprukeată sinonimia anamisa di limba română şi aşi-dzăsa “limbă moldovenească”. Aurescu băgă accentu pi ananghea ta s’hibă aflati cătu cama ntrăoară cearei durabili ti ndrepturile a persoanelor ţi tănu di minoritatea română ditu Ucraina şi cundille ananghea ti ahurhearea diznău a lucurlui di la Comisia mixtă interguvernamentală mutrinda protecţia a ndrepturilor ti persoanili ţi tănu di minorităţli naţionali şi ti bitisearea a păzărăpserloru tu ligătură cu Protocolu di cooperari bilaterală româno-ucraineană tu dumenea a truviţămintului. Aurescu şi Kuleba zbură şi ti gaereţli mutrinda extinderea ti reprezentarea consulară tru ateali dauă stati, pritu dişcllidearea-a unui Birou consular tu Ismail, parti a Consulatlui General ali Românie la Odessa şi, respectiv, a unui Consulat ali Ucraină la Sighetu Marmaţiei. Atelli doi miniştri di externi avură ună trutrivideari, tu weekend, tu marja a Forumlui di Diplomaţie dizvărtitu Antalya, tru Turchie. Tu arada ali trutrivideari nica fură acăţati tu debatu lucre mutrinda catandisea di securitati la Amarea Lae şi nădiili europene şi euroatlantiţi ali Ucraină.
***Românii cari agiungu pi cali aeriană tru Spania nu lipseaşti să spună certificatlu cari atestă vaccinarea completă, un testu negativ PCR ică antigen ili certificatlu di recuperari post-COVID-19, deadi hăbari Ministerlu român tră Afaceri Externe. Alăxearea s’faţi di itia că România numata faţi parti ditu cătiguria-a statilor cu risc criscutu di infectari. Bucureştiul fati timbihi, ama că armâni valabilă borgea că tuti persoanele cari nkisescu calea cătă Spania, pi cali aeriană ica maritimă, s’ngrăpsească, nintita s’nkisească călătoria, un formular mutrinda catandisea di sănătati, cu agiutorlu ali aplicaţiei Spain Travel Health ica a frăndzăllei di internet spth.gob.es. Tru catandisea tru cari pasagerlu easti minor ica ună persoană dependentă, formularlu poati s’hibă completat di tutore, cari va s’hibă căţe informaţiili dati suntu cadealihea. MAE român cundilleadză că, dupu completarea-a formularlui, va s’hibă adratu un codu unicu QR di sănătati, cari va s’lipsească s’hibă părăstsitu tru format digital ica pi carti la controlu di sănătati adratu tru aeroportul ica portul di destinaţie. Cara formularlu va s’hibă simnatu ditu aplicaţie, aestu va si s’veadă tru secţiunea “Călătoria mea”, a deapoa a ufilisitorlui va’lli si pitreacă şi un e-mail cari poati s’hibă imprimatu.
***Liga a Studenţălor Români ditu Xinătati – Filiala Italia organizeadză, ahurhinda cu 23 di cirişaru, evenimentul “IEs to tradition, IEs to modernity”, ndreaptu ti Dzuua-a Iillei marcată tu 24 di cirişaru. Evenimentul, organizat cu patronajul a Ambasadăllei ali Românie la Roma, va s’dizvărtească emu tru mediul online emu tru format fizic, cu tiňisearea-a normiloru di protecţie sanitară băgati di guvernul italian. Tu 23 şi 24 di cirişaru, LSRS Italia va s’lanseadză un teaser video pi frănda Facebook şi Instagram cu scupolu ta s’yiurtusească iia şi să spună evoluţia a llei naturală ditu nai cama veclliulu kiro până tru dzuua di adză. Materialu video naeti să scoată tu videală portul tradiţional ndziminatu cu lenu turlii di alti straňie moderni. Tu 25 di cirişaru va s’hibă ndreptu un workshop online cu experţă tru ţisături şi cuseri, cari va lă exighisească a participanţăloru tehniţli şi proţedurli pritu cari s’adară cămeaşa cu altiţă. Singirlu di evenimenti va s’bitisească tu 26 di cirisaru cu ună expoziţie de ii ditu ma multe regiuni ali Românie, organizată la Villa Fornarola ditu Albano Laziale, tru zona metropolitană a Romăllei şi cu ună gimbuşi la cari va s’llia parti studenţă români şi italieni. Atelli sinfirisiţ pot s’află ma multi hăbări pi frăndz di Facebook a LSRS Italia.
***Regizoarea di teatru Ioana Păun, ţi easti tru rezidență artistică Viena, prezentă pi 20 și 21 di cirişaru performance-ul “Pick the color of my tears” cu actriţa Bianca Pintea. Evenimentul, un protu proiect ditu un şingiru di reflecții post-pandemiţi, s’dizvărti tru spaţiul expoziţional frei_raum Q21 ditu MuseumsQuartier, unu ditu nai cama mărli locări culturali ditu lumi. ICR Viena, cari ndrupaşti rezidenţa a Ioanăllei Păun, dimăndă că “Pick the color of my tears” adusi la cathi participantu acces privat la ună reprezentație live a plângutlui. Actriţa Bianca Pintea fu angajată s’plângă ti dealihea, tru ună turlie repetată, nkisinda di la un stimul diferitu cathi oară, a deapoa mutritorlu avu ucazea ta să-lli ajusteadzăa lăcărňili, tru simfunie cu a lui vreri și limiti. Tru tutu kirolu a reprezentațiillei, spectatorlu fu invizibil și anonim. Ioana Păun easti sinfirisită ta s’veadă turliili tru cari oamiňilli au purtaticu andicra di circumstanți greali politicu, icuonomicu ica cu implicații tră sănătati şi colaborat cu teatre şi muzee ditu Franţa, Belgia, Marea Britanie, Statele Unite ali Americă, Palestina, Austria, Grecia şi România. Actriţa Bianca Pintea ari dauă licențe tru actorie şi, ti căfatri năi turlii di expresie, thimilliusi tru România Experimental Acting Laboratory. Tru 2020, s’mută Viena cu mirakea ta s’află năi turlii di artă.
Autoru: Udălu a hăbărlor
Armănipsearea: Taşcu Lala
