Hăbări ditu bana românească şi internaţională
FISCALITATE. La 1 agustu s’bagă tru practico niscănti di misurile fiscale introduse tora ma ninti di guvernul di coaliție adratu ditu Partidul Național Liberal, Partidul Social Dimocrat și Uniunea Dimocrată a Etniţlor Maghiari ditu România. Luni va s’crească acciza la ătumi, idyea și impozitul pe amintatiţli ditu agiocurli cu şcurtica. S’fac alăxeri şi tu ţi mutreaşti tiñiili di cafi mesu tru industria construcțiilor, agricultură și alimentație, iu plafonul ti niscănti ñicurări di taxe va s’hibă redus. Alte alăxeri a Codlui Fiscal va s’bagă tru lucru tru ahuhrhita a anlui yinitoru. Ti exemplu, tru industria ospitalitatillei TVA-ul va s’hibă criscutu di la 5 la 9%, kiro tru cari TVA-ul ti bira ţi nu ari alcool și ti biuturli zaharoase va s’hibă majorat la 19%. Vindiri di case ma mări di 120 mp. I ti păhadz di pisti 120.000 EUR va s’aibă şi TVA majorat. Uidisitu cu estimărli guvernamentale, aesti alăxeri va s’aducă a bugetlui di stat nica 243 di miliuñi di euro tru aestu anu și aproximativ 2,1 miliardi di euro tru 2023.
Newsroom, 31.07.2022, 19:29
FESTIVAL. Festivalu Sighişoara Medieval” ditu ţentrul ali Românie s’bitiseaşti adză cu un concert ţănut di trupa rock Cargo şi un spectaculos spectacol di artificii. Tu aestu kiro, la cea di-a 28-a ediție, festivalu adusi diznău hăvaia medievală cu agiutorul aţiloru cama di 100 di artiști participanț. Evenimentili avură spectacole di muzică și dans medieval, piese di teatru, animație și ateliere di artă și isnăhi. Festivalu fu ndreptu sumu patronajlu a Majestatillei a Llei Margareta, custodi al Coroanăllei ali Românie. Sighişoara easte goala ţitati medievală bănată ditu sud-estul ali Europă.
MILITARĂ. Nai ma vărtoasă forță di asalt aerian ditu lume, Divizia 101 Aeropurtată a SUA, ș-ahurhi misiunea tru România, dupu ună apofasi loată tu aestă noimă la aţelu ditu soni summit NATO di la Madrid. Premierl uNicolae Ciucă lo parti sâmbătă la ţeremonia la cari unitatea americană ș-părăstisi hromli la Baza Aeriană Mihail Kogălniceanu 57 și salută prezența aliştei forțe, cari contribuie la anvărtuşearea a flancului estic al NATO. Oficialu român haristusi a trupelor americane arădăpsiti tru România ti efortul și contribuția la securitatea a văsiliillei. Civillli, personalu aeroportului și familiile a lor mutriră diapoa ună dimonstrație impresionantă cari yilipseaşti puterea di foc a forților armate române și americane. Thimilliusită tru 1942 tra s-u elibereadză Europa di ocupația nazistă, Divizia 101 Aeropurtată ditu SUA are 2.400 di militari arădăpsiţ tru România, 4.700 tru Europa și aproapea 20.000 tru lumi. Maş tru ună noapte, poate s’ascumbusească ună brigadă di 4.000 di militari și suti di vehicule militare, echipamente și sistemi di arme, ună forță di asalt axizită s’azvingă iţi adversar.
COVID. Piste 4.000 di noi infecții cu SARS-CoV-2 ditu piste 13.000 di teste, cum și 13 di dicese ligate di COVID dimăndară dumănică tru România, autoritățile. Numirul a pacienților cu COVID trua spitale easte di piste 3.900, ditu care piste 260 sunt la terapie intensivă. Autoritățile estimează că săptămâna yinitoari România poati s’aibă 10.000 di cazuri noi ndzuuă. Acă s’arăspândiaște multu ayoñea, aestă variantă a virusului aduţi forme ma puțăn severe a lăngoarillei.
Autoru: Udălu a hăbărloru
Armânipsearia: Taşcu Lala
